Read lumasaaba Tsizabuli 53 Bible Online

Tsizabuli 53 - lumasaaba bible

Tsizabuli 53

¹Babaandu baasilu balomela mu myoyo kyaabwe bari, “Mbaawo Wele ta.” Baayonekha, bakhola bye bumoyaani; mbaawo namutweela ukhola buulayi ta.

²Wele emikha mwikulu waalolelela aasi khu baandu boosi, nga akana abone noola iliwo babaali bakyesi babaamwisaaya niye.

³Ne boosi baashuukha baamwantsukha baatsya, boosi bali shitweela busa, baayonekha; mbaawo na mutweela ukhola shilayi ta, mbaawo ikhaba na mutweela ari ta.

⁴Abo babaakhola bye bubwoonaki sibali ni khuumanya ta, nibo balumaka babaandu baase baaba nga babaalya biilyo, naluundi nibo sibesaayakho Wele nakhari ta.

⁵Ne lwanyuma bakhaarye naabi, musaambo isi bakharyatsakakho baryo ta! Lwekhuuba Wele alisalanisa kamakuumba ke baasiku be babaandu beewe, balifuuribwa baswaale, lwekhuuba Wele waabaloba nibo.

⁶Khali buwonesi bwa Wele bwiitsile nga bwaama mu Sayuuni! Wele nga waakobosile babaandu beewe mu bulamu buulayi, babaandu ba Yakobo balikhoya, naluundi ba Isiraeli boosi balisangaala.