Read lumasaaba Tsizabuli 55 Bible Online

Tsizabuli 55 - lumasaaba bible

Tsizabuli 55

¹O Wele, n'uwulile khuuloomba khwase, ukhebisa waalekha khuwulila khukhwilootsa khwase ta.

²N'umbuliilise ise untsilemo; bikosi byase byaamalilemo ise kamaani. Ise naaweelelemo ilala,

³khulwe liyoombo lye khuuriisariisa khwe baasiku baase, ni lwe khuuminilisibwa khukhwaama isi babaandu baabi. Lwekhuuba nibo baakhola khwiise busiku bukali, ni lwe lirima lyaabwe baayimbiyila ise.

⁴Ise netsuulemo naabi kumutaambo, ni shiriisa she khuufwa shaamaliilemo ilala.

⁵Khuurya ni khuunikina ise byaantsolelekho, ni shiriisa shaamaliilemo ise ilala.

⁶Indyo nilomela senyene ndi, “Imba nga ubeele ni tsindaha nga liwuusi, khali imbururukhile, ntsya khuweentsa shiifwo she khuuwolelamo;

⁷khali naandipaamburukhile ntsya aleeyi, iyo nikholela shiifwo she khuumenya mu mubiimbi.

⁸Khali nifuniile khaangu isi nibisa khuuwona ikhuungu iye kamaani ni luwuutse.”

⁹O Umukasya, niwoonakise tsinengekharengekha tsaabwe, ukosaase lulimi lweesi bakanikha; lwekhuuba ise imbona ndi iliwo bisayuumba ni khuulomana mu shiriimba.

¹⁰Kumuusi ni mu shilo babotokhelela kamatikiiyi ke shiriimba, baryo baashitsusamo buumoyaani ni buukosi buukali.

¹¹Nibo boonakisa bibiindu bibiili mu shiriimba; kimikhoosi kyamwo kyetsuulemo khuumiiniliisa babaandi, ni buwombesi buukali.

¹²Abe iba nga umusiku wase niye uwukhomaka ise, khali nyalile khukhwikhalilikha. Abe iba nga uyo uwaambiyila ise niye uwuntsibwiyililakho, khali inyalile khumwibisakho.

¹³Ne uyo uwukholakho khwise bino, ali umuundu uyo uwikhala ni nase, uwashaase umweene, umusaale wase ilala.

¹⁴Ifwe khwakanikhatsaka fweembi inganikha indayi, khwesaayilatsakila atweela mu Liisaayilo Liikhulu.

¹⁵Ari lekha khuufwa khwoole khu baasiku baase khaangu naabi, beekhe i makoombe nga bashiili baalamu; lwekhuuba bamenya muungo tsitsiilimo bubwoonaki, naluundi bambaasa buubi mu myoyo kyaabwe.

¹⁶Ne ise nilootsela Wele nga inoomba buyeeti; ni naye Umukasya kane ambonese ise.

¹⁷Kumutikhinyi, mwihangilwe ni angoloobe, ise imba mu khwiŋuluŋuunya khwase nga newunamiile isi Wele ali. Ni naye kane awulile likono lyase.

¹⁸Alingobosa ise ni lukoosi nga sendikho buubi ta khukhwaama mu busoolo bweesi ise isoolana; ni baasiku baase bali baakali.

¹⁹Ne Wele uwula khukhwaama liina na liina, alingobolamo ise, abaminiangule nibo; lwekhuuba sibashuukha tsisaambo tsaabwe ta, naluundi sibesaaya Wele ta.

²⁰Uyo uwaba uwashaase asokosana basaale beewe, wafuniaaka ikwangwaani abe isi akhola ni nabo.

²¹Bilomo byeewe byaba biwolu buulayi nga biwosawosa, ne nga mu mwoyo kweewe mwabamo busoolo; bilomo byeewe byaba biilayi ni khufuurakho kamafura kakawosawosa bibyuuma, ne nga mu mwoyo kweewe mwabamo bibyambaaso bibiyiima khukhwoonakisa, nga lurima.

²²Bikosi byoowo n'ubilekhele Umukasya, ni naye kane akhuliinde iwe; niye s'alekha babaandu beewe babaamwiyikina niye bafuuribwa ta.

²³Ne iwe, O Wele, ulituuma babaandu babeeri abo luundi babeeyi mu lilowo lileeyi; nga kimiiko kyeesi baandimalile khu shibala kishiili khwoola ta. Ne ise kane ikhwiyikinatsake iwe.