Read lumasaaba Tsizabuli 56 Bible Online

Tsizabuli 56 - lumasaaba bible

Tsizabuli 56

¹N'umaambile ise shiisa, O Wele, lwekhuuba babaandu baantsibwakala; baasiku baase baangubyeenga shifukhu shoosi.

²Baasiku baase baantsibwakala shifukhu shoosi, babaasoolanisa ise bali baakali busa.

³Buli lweesi imba nga naariire, ise ikhwiyikina iwe.

⁴Wele niye isi ise niyikina akhali khuurya ta, ise imuruuya lweebyo byeesi anomela ise. Babaandu busa nabo banyala khukhukholakho shiina?

⁵Shifukhu shoosi baasiku baase baweentsa khukhuuntsiinisa ise; byeesi bambaasa byoosi bili bye khu khuukhola ise buubi.

⁶Boosi babuusanila atweela mu shimoonyo, nga balolelela buli shoosi sheesi ise ikhola, nga beereka khukhuuntsira ise.

⁷Uryo n'ubawe shitaambiso lwe buubi bwaabwe, O Wele; khulwe lirima lyoowo, n'uminiangule kamanaambo kano.

⁸Iwe niye umanyile nga ise nikholaka shiisa; n'ubiikhe kamasika kaase mu kungutsi yoowo! Kameene kano kaakhuronebwa mu shitabo shoowo ta?

⁹Khu shifukhu khweesi ise ndikhwilootsela iwe, baasiku baase boosi ulibatimisa beeleyo. Khulwekhuuba ise naashimanya ndi Wele ali khu luwaande lwase.

¹⁰Ise imbuyila Wele khu lweebyo byoosi byeesi aloma, imbuyila Umukasya lwe lomo yeewe.

¹¹Wele niye isi ise niyikina akhali khuurya khwoosi ta. Babaandu busa nabo banyala khukhukholakho ise shiina?

¹²O Wele, ise kane nolelese byeesi ise nakhusuubisa iwe; kane ise ikhuwe iwe biwaanwa bye khusiima khwase.

¹³Lwekhuuba iwe waawonesele buulamu bwase khukhwaama mu khufwa, iwe waandikiya ise naalekha khukwa ta; nio inyale khuukyeendela mu moni tsa Wele mu buwaanga bubwaaburukhila abo babaali baalamu.