Read lumasaaba Tsizabuli 57 Bible Online

Tsizabuli 57 - lumasaaba bible

Tsizabuli 57

¹O Wele n'umaambile ise shiisa, n'umaambile shiisa, lwekhuuba ise nilukhila is'iwe lwe buyeeti. Ise nilukhila mu shiniini she tsindaaha tsoowo lwe buliindi, khukhwoolesa bukosi bwe khuuhela nibuliwawo.

²Ise ndilila Wele uuli Angaaki Lukali kamasika, isi Wele uyo uwolelesa byeesi aŋoonaŋoonela ise.

³Niye alingobolamo ise nga eemikha mwikulu ambonese ise, aliwula abo babaanangana ise. Wele alintsokesanisa ise khuukana khweewe khukhuukhakama ta, ni bubwiyikinwa bweewe.

⁴Ise ndi akari busa mu baasiku baase baantsibotokheleele, babaali nga tsitalanyi tse kumuluungo, tsitsiilya babaandu. Kameeno kaabwe kaayokiya nga kamafumo ni buyiingo, ni tsinimi tsaabwe tsaamema nga lurima.

⁵O Wele, ni wokese bukhulu bwoowo angaaki mwikulu! Khayo shiriifwa shoowo shibalaahe mu shibala shoosi.

⁶Baasiku baase baarekile kumureko khukhuumambisa ise; kumutaambo kwantsiwunamisile ise. Nibo banjabiile ise lilowo mu ntsila yase, ne khali nibo babeene balikwiilemo.

⁷Ise ndi ni khuukuma mu mwoyo kwase, O Wele, ise ndi ni khuukuma mu mwoyo kwase! Indyo kane niimbe kimyeenya luundi ikhuruuye iwe.

⁸Kane ise isisimukhe, kane ise isisimukhe ikhupe kumulele ni lituungu. Kane ise isisimuse nga inyaanga ishili khurura ta.

⁹Ise kane ikhusiimatsake iwe, O Umukasya, nga ndi akari mu baandu, kane niimbatsake kimyeenya khuukhuruuya iwe nga indi akari mu manaambo.

¹⁰Khuukana khwoowo khukhuukhakama ta khuuniina khwoola mwikulu, ni bubwiyikinwa bwoowo bwoola mu mafuumbi.

¹¹O Wele, ni wokese bukhulu bwoowo angaaki mwikulu! Khayo shiriifwa shoowo shimalatane mu shibala shoosi!