Read lumasaaba Tsizabuli 59 Bible Online

Tsizabuli 59 - lumasaaba bible

Tsizabuli 59

¹O Wele wase, n'umbonese ise khukhwaama isi baasiku baase, n'ungaye ise isi abo babaanangana.

²N'umbonese ise khukhwaama isi babaandu baabi, n'umbonese ise khukhwaama isi babeeri abo.

³O Umukasya, lwekhuuba bona, beerekile bakana khukhuuntsira ise; babaandu baarafu bebuusile atweela khukhuunangana ise; akhuba bari lwe shishiindu shiibi shoosi sheesi ise ikholile ta, namwe khukhwooneka khwoosi ta.

⁴Beerekekha khukhuunangana ise ukhalikho ni kumusaango kwoosi ta. Niwinyukhe ubone, yiitsa khaangu unjeete ise.

⁵O Umukasya Wele umunyali wa byoosi, iwe Wele we ba Isiraeli. Yinyukha uwe kamanaambo koosi shitaambiso, ukhokesa shiisa isi na mutweela khu baandu be tsimbomelo baabi bano ta.

⁶Buli angoloobe bakobola nga babookola busa nga tsiimbwa, nga tsiimbwa ni tsitiimaana mu shiriimba.

⁷N'ubabone abo shiina, bakhoma nga bariisariisa. Lulimi lwaabwe mukhanwa mwaabwe luli nga lurima; bambaasa busa bari mbaawo ubawulila byeesi nibo baloma ta.

⁸Ne iwe, O Umukasya, ubatsekhelela busa, iwe woonela babaandu be kamanaambo ke shibala.

⁹Mu maani koowo nimwo mweesi kumwiyikino kwase kuli. Iwe niye bubwilukhilo bwase, O Wele.

¹⁰Wele wase mu khukana khweewe khuukali kane antsakaanile ise, kane afukiilise ise khuubona baasiku baase nga baawulibwile.

¹¹Ukhabeera ta, O Wele, manya lukanile babaandu baase babebilila. Ne mu maani koowo n'ubasalanise, ubahese bawewo, O Umukasya Umuliindi wase.

¹²Khuukanikha buubi khwaabeelelela mu khanwa mwaabwe, khayo bawaambilisibwile mu khwiyiinga khwaabwe, lwe khuutsuba ni lwe khuuwombesa khwaabwe.

¹³N'ubahese nga ubirira mu lirima lyoowo, n'ubahesele ilala khukhwoolesa ni baliweelawo ilala, nio babaandu boosi bashimanye bari Wele ali umuwuli mu Isiraeli, naluundi awula ni khukhwoolesa mu manaambo koosi ke khu shibala.

¹⁴Buli angoloobe bakobola baabokola busa nga tsiimbwa, nga tsiimbwa ni tsitiimaana mu shiriimba.

¹⁵Bakyeendaana nga baweentsa bye khuulya, nga baakhunyoola biilyo bibibamala ta, bawoloomba.

¹⁶Ne Umukasya, ise kane niimbe kumweenya lwe khuuruuya kamaani koowo; buli kumutikhinyi kane ise niimbile angaaki lwe khuukana khwoowo khukhuukhakama ta. Lwekhuuba iwe uli niye bubwilukhilo bwase, mweesi ise nibisa nga ndi mu bikosi.

¹⁷Ise kane niimbatsake kimyeenya khuukhuruuya iwe, umwaayilisi wase, lwekhuuba iwe uli Wele wase uwuniinda ise. Iwe uli Wele uwuntsokesa ise khuukana khukhuukhakama ta.