Read lumasaaba Tsizabuli 60 Bible Online

Tsizabuli 60 - lumasaaba bible

Tsizabuli 60

¹O Wele, iwe waakhwikaana ifwe, naluundi iwe waafuniaaka tsimako tseefwe; abe iwe waakhukhalalila ifwe naabi ne ari n'ukhukobose is'uli.

²Iwe waakila shibala shaanikina, waashityenuula shaabayuukha. Ne ari iwe n'ufuunikhake tsiifwa tsasho, waakamise khuunikina khwasho.

³Iwe waakila babaandu boowo baabonabona kimiluundi mikali; waakhuwa ifwe babaandu kumutaambo kwaaba nga shishimeesa, ifwe khwasambakana busa lwe kumutaambo nga babaameelile.

⁴Ne isi abo babaakhurya iwe, waabenyusiile ibendela ye khuureewula, nio banyale khukhwilukha khukhwaama isi buyiingo bw'omusiku.

⁵Iwe n'uraambise kumukhono kwoowo, ukhuwonese ifwe baakanwa boowo, ukhunyalise ifwe khuuwula baasiku nga ukhwiilamo.

⁶Wele nga ali mu shifwo sheewe shikhosefu aloma ari, “Mu khuwula baasiku, ise indyawukhanisamo Sekemu, luundi ingabananisemo litila lya Sukosi bisiintsasiintsa.

⁷Gileyadi shili shisiintsa shase, ni Manase nasho shili shishase. Efurayimu niyo ikofiila yase mu busoolo, ni Yuda niye imiimbo yase iye bunyala.

⁸Ne Mowabu ali busa nga lukalaaya lwase lwe khuusaabilamo kamakhono. Ni khu Edomu nikhwo khweesi ise induuma bilaalo byase, khukhwookesana indi ise naashiwulile mu busoolo; naluundi ise inakuukuula nga inaangilila lwe khuuwula ba Firisitiya.”

⁹Ne naanu ulintsinjisa ise mu shiriimba shishiilikho tsimako? Naanu ukane anaangilile ise khukhwinjila mu Edomu?

¹⁰O Wele, iwe waakhwikaana ifwe, waalekha khutsya ni kamaye keefwe khuusoolanisa baasiku ta?

¹¹N'ukhuyeete ifwe mu khusoolanisa baasiku, lwekhuuba buyeeti bw'omuundu busa sibumala ta.

¹²Ne Wele nga ali atweela ni nafwe, kane khuwule mu busoolo, naluundi niye ukane asaambakilile baasiku boosi aasi.