Read lumasaaba Tsizabuli 61 Bible Online

Tsizabuli 61 - lumasaaba bible

Tsizabuli 61

¹O Wele, wulila khukhwilootsa khwase; urekeerese khuuloomba khwase.

²Nga ndi aleeyi iyo ibwaakamilo we shibala, ikhwilootsela iwe; ikhwilootsela nga kumwoyo kwase kuwetsekhelela; uryo unaangilile ise umbile khu lwaanda luluuli angaaki khukhufuurakho ise samweene.

³Lwekhuuba iwe niye bubwilukhilo bwase, iwe niye lumako lwase lwe kamaani, luluukhiinga ise khukhwaama isi baasiku baase.

⁴Khayo ise imenyatsake mu weema yoowo biilo ni biilo. Khali ise imbeele buulayi nga ndi aasi e shishisiisa she tsindaha tsoowo.

⁵Iwe waawulila bisuubiso byase byeesi ise nakhola isi iwe uli, O Wele. Iwe waayiimba ise buusikha bweesi uwa abo babaakhwiisamo iwe shiriifwa.

⁶Iwe n'ulooselekho buuleeyi bwe biifukhu by'omuyiinga, khali amenyelewo kimiiko mikali biilo ni biilo.

⁷Khayo ekhale awule nga umuyiinga mu moni tsoowo, O Wele; khali khuukana khwoowo khukhuukhakama ta, ni bubweela bwoowo bimuliindile niye.

⁸Nio lwanyuma nase niimbe kimyeenya khuuruuya lisiina lyoowo, na buli shifukhu khukhwoolelesa bisuubiso byase byeesi ise nakhola.