Read lumasaaba Tsizabuli 62 Bible Online

Tsizabuli 62 - lumasaaba bible

Tsizabuli 62

¹Bulamu bwase bunyoola shiwolelo mu Wele yenyene; ni buwonesi bwase bwaama mu niye yenyene.

²Niye yenyene lulwaanda lwase luundi niye buwonesi bwase; niye ali umuliindi wase, mbaawo sheesi ise inyala naarya ta.

³Inywe mweesi mulyoolesa eena khukhwibwakala umuundu ni khuumukhupa waakwa aasi? Mwaakhupa ise mwaafwaana nga mumukhupa litikiiyi lilinamiliile, namwe nga lumako lulufunikhile?

⁴Inywe mukana busa khukwiisa umuundu aasi khukhwaama mu shifwo sheewe she shiriifwa. Inywe mwikhoyela bubeeyi. Inywe kiminwa kyeenywe kikanikha bye khuuwa tsikhabi, ne nga mu myoyo kyeenywe mukanikha bye khuutsuba.

⁵Mu Wele mwoonyene nimwo mweesi ise inyoolela lukoosi, kumwiyikino kwase kwaama mu niye yenyene.

⁶Niye yenyene niye lulwaanda lwase luundi buwonesi bwase; niye buliindi bwase, ise siinyala naayeŋanisibwa ni shishiindu shoosi ta.

⁷Buuwonesi bwase ni shiriifwa shase byemikhile khu Wele yenyene; niye ali lulwaanda lwase lwe kamaani, naluundi ali bubwilukhilo bwase.

⁸Inywe babaandu mweesi ni mumwiyikine imbuka yoosi, naluundi mumuboolele bikosi byeenywe byoosi; lwekhuuba Wele niye ali bubwilukhilo bweefwe.

⁹Ilala babaandu boosi bali busa nga kumuukha kweesi ifwe khuheela. Oba babaandu bali be angaaki namwe oba bali be aasi, boosi ni bapimibwa khu mintsaani, boosi mbaamo busiro ta. Boosi atweela bayaanguwa busa nga kumuukha.

¹⁰Mukheyikina khunuula bibiindu ni kamaani ta, namwe mukheyikina bibiindu bye bubwiifwi ta. Abe buyiindifu bweenywe bwakheloosela, mukhabumalilakho kimyoyo kyeenywe ta.

¹¹Wele waakanikha bibiindu bibili; ni nase nawulila ndyo khunyoowa nga aloma ari, bunyala bwoosi buli mu niye.

¹²Naluundi ari, khukana khukhuukhakama ta khwaama isi Umukasya. Ilala Umukasya alisasula buli mutweela nga buraambi bweewe ni buli.