Read lumasaaba Tsizabuli 65 Bible Online

Tsizabuli 65 - lumasaaba bible

Tsizabuli 65

¹O Wele, iwe waakhila khuuruuyibwa mu Sayuuni; isi iwe ifwe khwoolelesa byeesi ifwe khwasuubisa.

²Lwekhuuba iwe wiilamo khuuloomba khwe babaandu, boosi kane beetse is'uli,

³lwe bibyoonako byaabwe. Bibyoonako byeefwe ni biba nga byaakhuwulile ifwe kamaani, iwe niye ukhwiyakhila busa.

⁴Bali ni tsikhabi abo beesi iwe urobola waabareera aambi ni wamweene; beesi iwe ureera khuumenya mu lwaanyi lwoowo lukhosefu! Ifwe kane khwikusibwatsake ni bibiindu biilayi bye mu ntsu yoowo, biilayi bye mu Lisaayilo lyoowo Likhosefu.

⁵O Wele, iwe uli umuwonesi weefwe. Naluundi iwe wilamo khuuloomba khweefwe nga uraambisa buraambi bwoowo bwe kamaani bubwiyaangisa. Babaandu be mu shibala shoosi bakhwiyikina iwe, atweela ni naabo boosi babaali aleeyi we tsinyaantsa.

⁶Iwe lwe kamaani koowo warawo tsinjiinji, nga wamweene wokyesana bukhulu bwoowo.

⁷Iwe mu mbuka iyo wasilisa khukhwilyebula khwe kameetsi ke mu nyaantsa, ni liyoombo lyako lye khuuyiilila, atweela ni khuuyokesa khwe kamanaambo.

⁸Babaandu boosi babaamenya aleeyi we shibala baarya lwe buraambi bwoowo bubwiyaangisa; iwe niye ukila antsye khukhwaama nga ni bushya khukhwoolesa ni bwilabula, khuyokesa lwe kumwikhoyo.

⁹Iwe wokesanisa khukhwiinaanayo khwoowo isi shibala nga ubakhupisila ifula, wabawa buyiindifu bukali. Luluutsi lwa Wele lwayitsulamo kameetsi, lulukila babaandu bafuna bye khuulya, lwekhuuba iwe wamweene niye uwalurawo.

¹⁰Iwe wamweene niye ukhupisa ifula mu mikuunda kikilimibwile, uryo waakitosa ni kameetsi khuukiwosawosa naluundi waawa bimiitswa tsikhabi khuutsowa.

¹¹Iwe uuwa imbuka ye likyesa tsikhabi nga bye khuukyesa bili biikali, ni kamakaali kakaakhweesa keetsusibwa ni bibikyesebwile.

¹²Kamaayilo ke mu mubiimbi ketsuule bunyaasi, ni tsingoongo tsetsuule ni kumwikhoyo.

¹³Kamaayilo kasalasaale ni bibyaayo, ni kamatila ketsuulemo bye khuukyesa, buli shiindu shiyokesela angaaki nga sheemba lwe kumwikhoyo.