Read lumasaaba Tsizabuli 66 Bible Online

Tsizabuli 66 - lumasaaba bible

Tsizabuli 66

¹Ni muruuye Wele ni kumwikhoyo, inywe babaandu mweesi.

²Ni mweembe nga muruuya shiriifwa she lisiina lyeewe; mumuwe niye lubuyi lwe shiriifwa!

³Ni mulome Wele muri, “Nga buraambi bwoowo buli bwe kamaani! Bunyala bwoowo nga bukali, bubuukila baasiku boowo baakwa aasi lwe khuurya!

⁴Shibala shoosi shikhwisaaya iwe; babaandu boosi beemba lwe khuukhuruuya iwe, beemba khuuruuya lisiina lyoowo.”

⁵Ni mwiitse mubone byeesi Wele akholile, bibiindu bibiyaangisa byeesi akhola akari mu baandu!

⁶Niye mu mbuka iyo akalusa inyaantsa khuuba liloba lilyoomu, waakila babaandu babirira mu meetsi nga bakyeendela khu bikyele busa. Abweenewo ifwe khwekhoyela mu niye.

⁷Wele ali umuwuli biilo ni biilo. Naluundi ni tsimoni tseewe alolelela kamanaambo, nashiryo ikhabawo umuundu yeesi umumiinyaalila ta.

⁸Ni muruuye Wele, inywe babaandu mweesi, Khayo liyoombo lye kimyeenya kyeenywe kyeesi mwiimba liwulilikhe.

⁹Lwekhuuba Wele waaliinda buulamu bweefwe, naluundi niye waakhulekha baasiku beefwe khuukhuwula ifwe ta.

¹⁰O Wele, iwe wakhukhaka ifwe, naluundi wakhuŋoonaŋoona ifwe nga ifeeza ni ŋoonaŋoonebwa ni kumulilo.

¹¹Iwe wakila ifwe khwaakwa mu mureko, uryo waakhurakho ifwe buusiro buukali khu mikoongo kyeefwe.

¹²Iwe waafukiilila babaandu khuukhwiima khu mirwe kyeefwe; khwaabirira mu mulilo ni mu meetsi, ne bona iwe waakhureera ifwe waakhwiinjisa mu shifwo she bibiindu biilayi.

¹³Ise kane ninjile mu ntsu yoowo nga indeera biwaanwa, indyo ise kane noolelese sheesi nasuubisa,

¹⁴isho sheesi ise nasuubisa ni kumunwa kwase, ni naba nga ndi mu bukosi.

¹⁵Ise kane indeere biwaanwa byase bibyooshe, bye bisolo binulu naabi, imbaaneyo biwaanwa bye kamasheese; naluundi kane ise imbaaneyo tsiwuunwa ni tsimbusi.

¹⁶Inywe babesaaya Wele mweesi ni mwitse muwulile; lekha ise imbaboolele nywe niye byeesi akholele ise.

¹⁷Ise namulilila naabi; namwembela naabi kimyeenya.

¹⁸Ise mba nga uwabiikha bibyoonako mu mwoyo kwase, khali Umukasya akhundekeeresa ise ta.

¹⁹Ne ilala Wele waandekeeresile ise, naluundi waawuliilisile khuuloomba kwase.

²⁰Khakhuruuye Wele lwekhuuba niye arekeeresa khuuloomba khwase. Naluundi niye angana ise ni khukhwiyikina khuukali naabi.