Read lumasaaba Tsizabuli 68 Bible Online

Tsizabuli 68 - lumasaaba bible

Tsizabuli 68

¹Khayo Wele enyukhe khu ngaaki nio akile baasiku beewe basalanile. Lekha abo babaamubiyila niye batitukhe khukhwaama mu moni tseewe.

²Nga n'ubona lisuusi litaamuusibwa ni mbewo; nawe baasiku boowo n'ubatamuuse uryo bawewo. Nga n'ubona bunini buyengukhaka lwe kumulilo, ni baboonaki nabo baryo bahele khukhwaama mu moni tsoowo bawewo.

³Ne lekha bakhosefu bekhoye, baasangaalile mu moni tsa Wele waabwe; lekha bekhoye bayokese lwe sangaalo.

⁴Ni mwiimbile Wele, mwiimbe kimyeenya khuruuya lisiina lyeewe; mubuyile uyo ukyeendela khu namufweeli; lisiina lyeewe bari Umukasya, nashiryo ni mumuruuye.

⁵Wele uwikhala mu shifwo sheewe shikhosefu, niye ali paapa we baafuubi, naluundi niye ulolelela banamulekhwa.

⁶Wele awa abo babaakhali ni aango muungo mwe khuumenya; waaraangirira baabowe khuubarusa mu mapuusu waabayila mu shifwo shilayi. Ne abo babaamumiinyaalila niye, bekhala mu shibala shishoomu busa.

⁷O Wele, iwe waraangirira babaandu boowo, nga iwe ni wakhuumba khuubira mu mubiimbi.

⁸Shiryo shibala shanikina, ni likulu lyakwiisa ifula, lwe khuubonekha khwa Wele uwe lukiingi Sinaayi, naluundi niye ali Wele wa Isiraeli.

⁹Iwe Wele wakwiisa ifula mu bukali, weesa bushaakha shibala shoowo shishaba shaayonekha.

¹⁰Babaandu boowo banyoola bumenyo mu shibala sheene isho, ni lwe buulayi bwoowo, O Wele, iwe wawa bataambi byeesi bakana.

¹¹Umukasya arusa shilakilo; ni naabo babayila kamakhuuwa kano baaba baakali, nga beemba bari:

¹²“Bayiinga ni kamaye kaabwe batitukha! Ni bakhasi naabo babaarama ingo bakabanana byeesi baafuna.

¹³Abe ikhaba nga baalala baakona akari mu masheese khuukaliinda, nabo bakabanana khu biindu baaba nga kamawuusi kakeetsuulekho ifeeza, ni tsindaaha tsako tsimelamela nga izaabu.”

¹⁴Ne Wele umunyali wa byoosi asalanisa bayiinga, shafwaana busa nga kamararara ni kakaakwa khu lukiingi Salumoni.

¹⁵Lukiingi Bashani nga luli lukiingi lwe kamaani; luli lukiingi lulwetsulakho bikiingi bileeyi!

¹⁶Iwe lukiingi luleeyi, lwashiina ulolelela ni libuba lukiingi lweesi Wele aarobola khukhwikhalakho, lukiingi lweesi umweene erobolela khuumenyakho?

¹⁷Nga Umukasya n'abonekha, eetsa ni kimikaanda ni kimikaanda kye kimikaanda kye kamaye, aryo Umukasya waama khu Sinaayi weetsa mu shifwo sheewe shikhosefu.

¹⁸Nga iwe ni waniina khu lukiingi luleeyi khu ngaaki, waraangila waatsya ni baabowe, naluundi wafuna biwaanwa khukhwaama mu baandu. Shino shaba ni khukhwaama mu baandu babaakhawulila ta, bari nio Wele anyale khuumenya mu bweene umwo.

¹⁹Khayo Umukasya aruuyibwe, niye ukhusutilakho ifwe bisiro byeefwe busheele; Wele niye umuwonesi weefwe.

²⁰Wele weefwe ali Wele uwonesa, ni mu niye nga Wele, Umukasya, ifwe khuwona khuufwa.

²¹Ilala Wele alyaraakaka kimirwe kye baasiku beewe, abo babaalehesa litsuune lyaabwe beloosela mu bwoonaki bwaabwe.

²²Umukasya aloma ari, “Ise ndikobosa baasiku boowo khukhwaama mu Bashani, ndibakobosa khukhwaama aasi mu nyaantsa.

²³Nio iwe unyale khuusaambaka bikyele byoowo mu mafuki kaabwe, ni tsiimbwa tsoowo natso tsilye byeesi tsinyalisa khukhwaama mu baasiku boowo.”

²⁴O Wele, lubatsaangwa lwe bakhosefu boowo lubonekhe, lubatsaangwa lwa Wele wase, luundi umuyiinga wase, nga enjila mu shifwo sheewe shikhosefu.

²⁵Babeembi be kimyeenya nga nibo babaaraangiile, khweelakho baakhupi be kamatuungu, ni bakhaana babasakayisa bibaati, nga bali atweela ni nabo.

²⁶Boosi beetsa nga beemba bari, “Ni muruuye Wele mu lubusano lwe babaandu baakali; ni muruuye Umukasya, inywe ba Isiraeli!”

²⁷Babaaraangila iburaangisi, nisho shikuuka sha Benyamini shishifuura bukyeekhe, lwanyuma baaraangilisi ba Yuda ni babaandu baabwe, ni baaraangilisi ba Zebuloni ni ba Nafutaali nabo baloondakho.

²⁸O Wele, iwe ni wokyesane bunyala bwoowo; yokyesanisa kamaani koowo nga ni wakhukholela ifwe makiboole.

²⁹Ni lwe Lisaayilo lyoowo Likhulu liliili i Yerusalemu, bayiinga baliitsa nga baasutile biwaanwa.

³⁰N'uwe shitaambiso kuusolo ukwo kukuumenya mu makhalaamba, wa shitaambiso baaraangilisi abo babaali nga tsiwuunwa ni tsimoosi tsatso. N'ubakhaandakilile aasi beetse nga baasutile biwaanwa; salanisa babaandu babaakana khuureera busoolo.

³¹Lekha baarume beetse khukhwaama i Misiri nga baasutile kamabaale ke buukusi bwe angaaki; lekha ba Esiyopiya benyuse kamakhono kaabwe mu ngaaki isi Wele.

³²Ari ni mwiimbile Wele kimyeenya, inywe buyiinga bwoosi bwe mu shibala! Ni mwiimbile Umukasya kimyeenya.

³³Uyo ukyeendela mu ngaaki mwikulu, likulu likhale ilyo, niye akuula ni likono lye kamaani.

³⁴Ni mulaangilile bunyala bwa Wele, bukhulu bweewe buli khu Isiraeli yeesi, ni bunyala bweewe buli mu ngaaki.

³⁵Wele wa Isiraeli ali uwe shiriisa nga ali mu shifwo sheewe shikhosefu. Niye uwa babaandu beewe bunyali ni kamaani. Wele aruuyibwe!