Read lumasaaba Tsizabuli 69 Bible Online

Tsizabuli 69 - lumasaaba bible

Tsizabuli 69

¹N'umbonese ise, O Wele, lwekhuuba kameetsi kaaniinile kantsolele ise mu milo.

²Ise nesiikhile aasi mu lutuumbi, mweesi ise ikhanyala khukhwiimikha ta. Ise nesiikhile natsiile mu shisiba she kameetsi kamaleeyi naabi, ni kameetsi kakaatima kalikho kambirirakho.

³Ise naaluwile lwe khuulila khwase khwe buyeeti, ni kumumilo kwase kwoomile, ni tsimoni tsase sitsili khuubona buulayi ta, lwe khuukhuliindiilila iwe.

⁴Abo babaambiyila ise akhali ilomo yoosi ta, bali baakali khuuminyisakho ni litsuune lye khu murwe kwase; baasiku baase bali baakali babaanomakho ise bye bubeeyi nga bakana khukhuumalawo. Bakila ise neesayo ibyo byeesi ikheeba ta.

⁵Iwe waamanya buubi bwase bwoosi, O Wele; mbaawo shiibi shase na shitweela shinyala shaabisibwa khukhwaama is'uli ta.

⁶O Umukasya Wele umunyali wa byoosi, ukhafukiilila abo babaakhwiyikina iwe khuuwaambibwa tsisoni khu lwase ta. O Wele wa Isiraeli!

⁷Iseese naayinyindaalila bukhomo khulwoowo, ni tsisoni tsaayintsitsulakho.

⁸Ise ndi busa nga umuutswa isi babandaayase, naluundi isi babaana ba maayi babeene, ise ifwaana busa nga umureende.

⁹Khuukana naabi khulwe Lisaayilo lyoowo Likhosefu khwookhelela musiise nga kumulilo, ni bukhomo bwaabo babaakhukhoma iwe, bukwa khusiise.

¹⁰Ise ni naba nga ndila naluundi nga mbuya intsala, babaandu beloosela busa khukhuukhoma ise.

¹¹Ise ni nakwaara bitsina, nekyela busa she khuukhoma isi nibo.

¹²Ise naayikyela she khuukuta isi abo babaali babekhali be mu shiriimba, naluundi naayikyela busa kumweenya kwe bameesi.

¹³Ne ise kane ikhuloombatsake iwe, O Umukasya, ni mu mbuka isi iwe wamweene warobola, kane untsilemo; n'untsilemo ise lwe khuukana khwoowo khuukali, O Wele. N'untsilemo ise lwekhuuba iwe uloondelela sheesi waloma she khuukhuwonesa ifwe.

¹⁴N'ukhweese ise unduse mu lutuumbi, ukhaandekha nesiikha ta, n'umbonese ise khukhwaama khu baasiku baase, ni khukhwaama mu meetsi kamaleeyi.

¹⁵Ukhalekha kameetsi kaketsuule khukhuumila ise ta, namwe ikhakwa mu shisiba shileeyi ta, namwe ikhakwa mu lilowo lileeyi lyamila ise ta.

¹⁶N'untsilemo, O Umukasya, lwe buulayi bwe khuukana khwoowo khukhuukhakama ta. N'ungoboleyo isi ise lwe bubweela bwoowo bukali.

¹⁷Ukhaantsibisakho ise umwakaanisi woowo ta, yuubakho khukhuuntsilamo lwekhuuba ise ndi mu bukosi bukali.

¹⁸N'uwiitse isi ise ndi umbonese, n'umbonese ise khukhwaama isi baasiku baase.

¹⁹Iwe wamanya nga baasiku ni bakhoma ise, nga ni bantsekhelela ise, naluundi nga ni bandekelesa ise; baasiku baase boosi iwe wabamanya.

²⁰Khukhomebwa khwaamalilemo ise kamaani, indyo ise newulila nga ulwaalile; nabawo nga nambaasa ndi kane bamaambile ise shiisa, ne khana mbaawo namutweela ta, indi manya kane bantsikhoyese ne nga mbaawo na khari ta.

²¹Baasiku baase baara buutwa mu bilyo byase, ni bulesa ni bwaandya, banyweesa ise indali ilulutsile.

²²Khayo tsimeetsa tse kamayiiya kaabwe tsikyele kimireko isi bali, khayo kamayiiya ke kimikhoyo kyaabwe kabe kimireko isi babeene.

²³Aso iwe n'iwikale tsimoni tsaabwe balekhe khubona ta, naluundi utorwaase kimikoongo kyaabwe kinikine biifukhu byoosi.

²⁴N'ubatsukhekho lirima lyoowo; ni buurafu bwoowo khali bubamilile nibo.

²⁵Khali bifwo byaabwe byoosi biramile busa nga mbaamo muundu ta; ni tsiweema tsaabwe khali sitsibeelewo n'utsikonamo ta.

²⁶Lwekhuuba bakubyeenga abo beesi umalile khaale khukhupa, naluundi bakanikha khu mutaambo kwaabo beesi iwe umalile khaale khuwunaka.

²⁷N'ubakhalile kumusaango kwa buli shibi khu shibi, naluundi ukhabafukiilila nibo khunyoola shiifwo mu buwonesi bwoowo ta.

²⁸N'usaangule kamasiina kaabwe khukhwaama mu shitabo she baalamu, namwe bakhabalibwila atweela ni naabo babaali bakhosefu ta.

²⁹Ise ndi mu butsiina luundi mu mutaambo kumukali; khali iwe undusile ise mu bukosi umbiikha mu shifwo she buliindi bwoowo.

³⁰Ise kane niimbile Wele kumweenya kwe khuumuruuya, naluundi imbuyile bukhulu bweewe ni khuumusiima.

³¹Shino kane shiikhoyese naabi Umukasya khuuminyisa khuuwaanayo ikhaafu, ni khuuminyisa khuuwaanayo iwuunwa intsowu.

³²Abo boosi babaamiinilisibwa kane babone shino luundi bekhoye, ni naabo babaaweentsa khukhwisaaya Wele kane beesibwemo kamaani.

³³Lwekhuuba Wele awuliilisa abo babaali mu mutaambo, naluundi s'ebilila babaandu beewe babaali mu bubowe ta.

³⁴Lekha likulu ni shibala byeembe kimyeenya khuuruuya Wele, lekha tsinyaantsa natso ni neebyo byoosi bibiili ni bulamu nabyo bimuruuye.

³⁵Wele aliwonesa Yerusalemu, naluundi ombakhe bushaakha biriimba bya Yuda, ni babaakaanisi beewe balimenya mubweene umwo khu liiswa lilyaabwe.

³⁶Ni babaana be babaakaanisi beewe baliba basikha khu liloba ilyo, ni naabo babaakana Wele balimenya mubweene umwo.