Read lumasaaba Tsizabuli 7 Bible Online

Tsizabuli 7 - lumasaaba bible

Tsizabuli 7

¹O Umukasya Wele wase, ise nilukhila is'uli; n'umbonese ise khukhwaama isi abo babaaweentsa khukhuuntsira ise, naluundi unduse mu bukosi

²nio balekhe khukhuundyenuulakamo ise nga italanyi n'ikhola sheesi ilya ta, naluundi balekhe khukhuumbila isi bakana nga mbaawo unyala khukhuumbonesa ise ta.

³O Umukasya Wele wase, noola iliwo shishiindu sheesi nakhola nga shino, noola iliwo shiibi shoosi sheesi ise nakhola,

⁴noola iliwo musaale wase yeesi isi ise nalyamo luwomelo, namwe noola nga iliwo umusiku wase isi natsiinisa nga mbaawo ilomo yoosi ta,

⁵lweesho khayo baasiku baase baandimise bamaambe, baasambakilile aasi luundi baantsire, baryo baandekhe nga naakalamiliile busa mwifukhuulu.

⁶O Umukasya, yinyukha ni lirima lyoowo liikali usoolanise baasiku baase; O Wele wase, siisimukha unjeete! Iwe wamweene lakila uri abewo bwa ŋali mu khukhala kimisaango.

⁷Lekha babaandu boowo be mu manaambo koosi babusane bakhwibotokhelele iwe, uryo ube umuwuli waabwe boosi nga uli khu shitsoloŋo shoowo mu ngaaki.

⁸O Umukasya, iwe niye umukayi we babaandu boosi, uryo n'ungaye ise, nga bukwalaafu bwase ni buli, naluundi iwe waamanya uri ise s'indikho kumusaango ta.

⁹Iwe uli Wele umukwalaafu wimenielesa kimyoyo ni bibyambaaso, n'umalewo buubi bwe baboonaki, ne abo babaali bakwalaafu ubawandalase.

¹⁰Wele niye ingabo yase mweesi nibisa, niye awonesa uyo uwe kumwoyo kumulayi.

¹¹Wele niye umukhali we kimisaango uwaŋali, buli busheele ekiitsa baabi.

¹²Ne babaandu baabi ni balekha khukhwibiiyisa ta, Wele kane awakale lurima lweewe; waafuumbile buyiingo bweewe waaburekekhelele khuulasa;

¹³luundi waarekekhele bye busoolo byeewe bibihesa, waarekekhele buyiingo bweewe bwe kumulilo.

¹⁴Ni mubone nga babaandu baabi ni bambaasa khuukhola buubi, betsuule bibyambaaso bye bumoyaani, luundi bibisaala bubeeyi.

¹⁵Barekekhela bashaabwe kimireko nga bayaba kamalowo, ne babeene ndi bashuukha baakakwamo.

¹⁶Bumoyaani bwaabwe bushuukha bwaabakobolela babeene, ni buutsiina bwe bituluungu byaabwe bubakobolela nibo.

¹⁷Ise kane isiimatsake Umukasya lwekhuuba niye ali uwaŋali, naluundi kane ise niimbatsake kimyeenya kye khuuruuya lisiina ly'Omukasya, niye uli angaaki luukali.