Read lumasaaba Tsizabuli 71 Bible Online

Tsizabuli 71 - lumasaaba bible

Tsizabuli 71

¹O Umukasya, ise nilukhila isi iwe uli, ukhaandekha naawulibwa luundi naaswaala ta.

²Mu bukwalaafu bwoowo niwiitse umbonese ise; n'uwulile khuloomba kwase umbonese.

³Iwe n'ube lulwaanda lwase isi ise nilukhilayo, iwe uli lumako lwase lwe kamaani luluniinda ise. N'ulakile busa umbonese, iwe bubwibisilo bwase luundi umuliindi wase.

⁴O Wele wase, iwe ni wiitse umbonese ise khukhwaama khu baandu baabi, umbonese khukhwaama isi babaandu baabi luundi baarafu.

⁵Ise kumwiyikino kwase kwoosi naakura musiiwe, O Umukasya uuli angaaki, naakhwiyikina iwe khukhwaama mu busooleli bwase.

⁶Buulamu bwase bwoosi naayimikha khwiiwe khukhwaama khukhusaalikha khwase, iwe niye uwandusa ise khukhwaama muunda wa maayi wase. Indyo ise kane ikhuruuye iwe biifukhu byoosi.

⁷Babaandu baakali baantsambaasilisa ise khuuba shishikhamanyikhana ta, ne iwe niye umuliindi wase uwe kamaani.

⁸Nashiryo ise kane ikhwiimbile iwe kimyeenya kye khuukhuruuya, ni khuukanikha khu bukhulu bwoowo khukhwoolesa antsye khukhwilabula.

⁹Ukhaantsikaana ise, waanduuma aleeyi nga ndi mu miiko kyase kye busakhulu ta; ukhaandekha ise senyene nga kamaani kambweelemo ta.

¹⁰Lwekhuuba baasiku baase balikho baboolanila khukhuuntsira ise; abo babaweentsa khukhuuntsira ise bateesela atweela.

¹¹Nibo baboolanila nga baloma bari, “Wele waamwantsukhile; khakhumutimise khumuwaambe, lwekhuuba mbaawo unamuwonesa ta.”

¹²O Wele, ukhambeela aleeyi ta! Yuubakho, O Wele, unjeete.

¹³Khayo abo boosi babaanganisa ise khuufwa basalanisibwe luundi ubamalewo; khali abo boosi babaakana khukhuuntsiinisa ise baswaalile.

¹⁴Ne ise kane ikhwiyikinatsake iwe buli imbuka, ni khuukhweembela iwe kimyeenya kye khuukhuruuya buli busheele.

¹⁵Ise kane inganikhatsake khu buraambi bwoowo bukwalaafu naluundi bubuwonesa babaandu buli busheele, abe ikhaba nga buraambi ubwo buli bukali naabi.

¹⁶Ise kane neembe kimyeenya khuukhuruuya iwe, Umukasya Wele; kane ise niimbe kimyeenya khuuruuya bukwalaafu bwoowo, bubuuli bubwoowo wenyene.

¹⁷Khukhwaama mu bwaana bwase iwe waayindeekela ise, ni nase sinayakamisa khuukanikha khu buraambi bwoowo bwe kamakaanga bweesi wakhola ta.

¹⁸Ni anaari abe ikhaba nga ise naahangaale mu miiko, ni litsuune lyase nga lyaakhosa khulwe tsiifwi, O Wele, ukhaandekha ta! N'ube ni nase khukhwoolesa ise ni indikanikha khu bunyala bwoowo bwe kamaani isi kimiboolo kikiili khukhwiitsa iburaangisi.

¹⁹Bukwalaafu bwoowo, O Wele, bwaaniina bwoola ni mu ngaaki mwikulu. Iwe waakhola bibiindu bikhulu naabi. Mbaawo nakhari uyo uuli nga iwe ta, O Wele!

²⁰Abe ikhaba nga iwe waakhola ise naanyoola bikosi biikali ni butsiina bukali, iwe wamweene ulingobosawo luundi; ulikhweesa ise khukhwaama aasi i makoombe, umbe buulamu bushaakha.

²¹Iwe ulingalusa ise khuuba umuundu umukhulu naabi, untsikhoyese luundi.

²²O Wele wase, ilala ise kane ikhweembele iwe kimyeenya khuukhuruuya iwe lwe bubwiyikinwa bwoowo nga inaambisa lituungu; kane niimbe kimyeenya ni kumulele khuukhuruuya iwe, Iwe Umukhosefu wa Isiraeli.

²³Iwe waayimbonesa ise! Ni nashiryo ise kane niimbe kimyeenya lwe kumwikhoyo khuukhuruuya iwe, kane ise niimbe khuukhuruuya iwe ni kumwoyo kwase kwoosi.

²⁴Ise kane inganikhe khu bukwalaafu bwoowo, khukhwoolesa antsye khukhwilabula. Lwekhuuba abo babaakhakakho khukhuuntsiinisa ise, iwe wabakhasisa luundi wabahaambisa tsisoni.