Read lumasaaba Tsizabuli 72 Bible Online

Tsizabuli 72 - lumasaaba bible

Tsizabuli 72

¹O Wele, n'uyeete umuyiinga woowo khuukhala kimisaango buulayi, ni bukwalaafu bwoowo bube isi umwaana woowo.

²Khali abeele umukayi we babaandu boowo uwe bukwalaafu, n'isi bataambi aba uwe bwa ŋali.

³Khayo shibala shireerere babaandu boowo buyiindifu, shibureerere mu bukwalaafu.

⁴Khali umuyiinga yuno akayile babaandu babaali bataambi, awonesa abo babataambataamba; aba umuwuli waabo babaabamiinilisa.

⁵Khali umuyiinga amenyelewo ni babaandu beewe bawulila atweela ni naye biilo ni biilo, nga inyaanga ni ishaburukha, ni kumweesi nga kushiiliwo.

⁶Khali umuyiinga ayeetile babaandu nga ifula n'iyeeta yatsowesa bunyaasi, nga ifula imonyakala ni iwosawosa liloba.

⁷Mu biifukhu byeewe nga umuyiinga khali babaandu bakwalaafu bafunile buyiindifu, ibawo buyiindifu khukhwoolesa kumweesi ni kuliwawo.

⁸Buyiinga bweewe khali bubaalayile khukhwaama khu luwaande lwe shibala lutweela khukhwoola khu luwaande luluundi, khukhwaama khu luutsi lululaangibwa Efurati khukhwoola isi shibala shakama.

⁹Khali uwanyiinyile babaandu babekhala mu mubiimbi baamwiinamila aasi baafukiilila buuwuli bweewe, ni baasiku beewe bakwa aasi mwifukhuulu mafumala.

¹⁰Naluundi khali uwanyiinyile bayiinga be Tarushishi ni be khu bikelemeesi, bamureerera niye kimisolo; bayiinga be Sheba ni Seba nabo bamureerera biwaanwa.

¹¹Khali ukholile bayiinga babaandi boosi baamwiinamila niye khuumwisaaya, ni kamanaambo koosi keetse kamwakaanisatsake niye.

¹²Lwekhuuba niye awonesa abo babataangataanga busa nga bamulilila, ni naabo babaali buubi nga sibalikho n'ubayeeta ta.

¹³Umuyiinga yuno asaasila abo babaali batoro luundi babataangataanga, naluundi awonesa buulamu bwaabo babaakhalikho na shoosi ta.

¹⁴Niye awonesa abo babaakubyeengebwa luundi babaabirisibwa buubi naabi, lwekhuuba buulamu bwaabwe buli bwe lisuno naabi mu moni tseewe.

¹⁵Khali umuyiinga amenyelewo biifukhu byoosi! Khayo babaandu be mu Sheba bamuwe niye zaabu. Khayo babaandu baloombele umuyiinga buli imbuka, naluundi khayo tsikhabi tsa Wele tsibe khu niye buli shifukhu.

¹⁶Khali ibeelewo biilyo biikali mu shibala, ni tsingoongo khali tsimalataane ni bimiitswa, bibe nga bibyaano bibiili khu Lebanoni; khali biriimba byoosi bitsuulemo babaandu, bafwaana nga bunyaasi bubuutsowa mu mikuunda.

¹⁷Khali lisiina ly'omuyiinga balikanikhilekho biilo ni biilo; khali lubuyi lweewe lumenyelewo biilo ni biilo nga inyaanga. Khali kamanaambo koosi kaweebwele tsikhabi khulweewe, ni kamanaambo keene kamulaanga niye khuuba uwe ikhabi.

¹⁸Umukasya Wele wa Isiraeli aruuyibwe naabi, niye yenyene ukhola buraambi bwe kamakaanga.

¹⁹Ni lisiina lyeewe lye shiriifwa liruuyibwe biilo ni biilo; khali shiriifwa sheewe shitsuule mu shibala shoosi. Amiina naluundi Amiina.

²⁰Khuno khwaakamisayo khuuloomba khwa Dawudi umwaana wa Yese.