Read lumasaaba Tsizabuli 73 Bible Online

Tsizabuli 73 - lumasaaba bible

Tsizabuli 73

¹Mu ŋali Wele ali umulayi isi Isiraeli, isi abo babaali bakwalaafu mu mwoyo.

²Ne ise natengaala aambi neenga khukwa aasi, lwekhuuba bikyele byase byaba byaaweelemo kamaani.

³Lwekhuuba libuba lyamaamba lwaabo babeyiingayiinga, nga naaboone babaandu baboonaki bibiindu bibatsiila buulayi.

⁴Nibo sibalikho ni bibibatsiina ta, babonekha be kamaani naluundi bali baalamu buulayi.

⁵Nibo sibalikho ni bibibataambisa nga babaandu babaandi ta, nibo sibatsiinisibwa nga babaandu babaaramile boosi ta.

⁶Nibo bakwaara khukhwiyiingayiinga nga n'ubona bubuuma bwe mu milo, ni buurafu babukwaara nga n'ubona shikwaaro.

⁷Mu khwiyinaanakho babeene, kimyoyo kyaabwe kyaamamwo buubi bwonyene, ni khukhwaambaasa khwaabwe khwaayitsula bubwoonaki.

⁸Nibo boonela bashaabwe nga bakanikha bilomo bye khuulekelesa, ni mu burafu bwaabwe bamiinilisa babaandi.

⁹Bakanikha buubi bwonyene khu Wele uli mwikulu, bakyeendaana khu shibala nga bakanikha bibikhalimo ta.

¹⁰Nashiryo babaandu ba Wele bashuukha baabaloondelela nibo, balekha khubabonamwo buubi bwoosi ta, baryo bafukiilila bilomo byaabwe, baaba busa nga umuundu n'anywa kameetsi.

¹¹Naluundi beelayo baaloma bari, “Wele anyala waashimanyakho? Iliwo sheesi Wele Uuli Angaaki anyala waamanya?”

¹²Ne ate nga baboonaki nibo bibiindu bibatsiila buulayi, bali ni buyiindifu bukali naluundi beloosela khuufuna bibiindi.

¹³Ilala ise naayikwaalasila busa mu mwoyo kwase, ni khukhwiliinda kamakhono kaase khuulekha khwooneka ta.

¹⁴O Wele, iwe ukila ise naatsiinisibwa shifukhu shoosi, na buli mutikhinyi ukholesaka ise shiisa.

¹⁵Ise imba nga uwalomaka bilomo biibi, khali sinaandibeele uwaŋali isi babaandu boowo ta.

¹⁶Ne ise ni nakhakakho khushimanyakho naabi, shamandalalila naabi,

¹⁷khukhwoolesa ni natsya nenjila mu Lisaayilo lyoowo Likhosefu; nio naamanya shiina shishiitsya khukholekha lwanyuma khu baasiku baase.

¹⁸Ilala iwe ubeemisa mu shifwo she burerere, nga bakwiile aasi baatsya mu khuhela.

¹⁹Nibo bahelela busa mu khaseela khakyeekhe khari, baweelawo ilala lwe shiriisa shikali!

²⁰Kane bakoraanewo busa nga kamarooro ni kawawo nga umuundu n'asisimukha. Ni nawe O Umukasya, n'ubonekha nabo bakooranawo.

²¹Ni nawulila butsiina bwe libuba mu mwoyo kwase, ni mu byambaaso byase newulila kumutaambo,

²²naba busa umuundu umusilu ukhamanya ta; nafwaana nga isolo iye mwiiswa is'uli.

²³Ne byakhaba biryo, ise ndi atweela ni nawe biifukhu byoosi, ni nawe umaamba kumukhono kumulayi.

²⁴Uryo unangilila ise ni kamakyesi koowo kamalayi, lwanyuma wantsakaanilila mu shiriifwa.

²⁵Naanu isi ise ndi naye mwikulu khukhwinyusakho iwe wenyene? Ni khu shibala khuno mbaawo shiindu shoosi sheesi ise ingana akhali iwe wenyene.

²⁶Kumubili kwase ni kumwoyo kwase binyala byaakhasikha, ne Wele niye uuli kamaani kaase, naluundi niye ali byoosi byeesi ise ingana biilo ni biilo.

²⁷Ilala abo boosi babaakhulekha iwe, O Wele, baliihela; naluundi wamweene uliihesa abo babaakhali baŋali is'uli ta.

²⁸Ne isi ise shili shilayi khuuba aambi ni nawe Wele. Ise naayirobolelawo iwe Umukasya khuuba nga niye Umuliindi wase; naluundi kane inganikhatsake khu buraambi bwoowo.