Read lumasaaba Tsizabuli 74 Bible Online

Tsizabuli 74 - lumasaaba bible

Tsizabuli 74

¹O Wele, lwashiina iwe ukhulekheele ifwe ilala uryo? Lwashiina ukhalalila naabi babaandu boowo beesi ulolelela?

²N'ushebulile babaandu boowo beesi weroborera khaalekho, babaandu beesi weloondela khuuba shikuuka she buusikha bwoowo. N'ushebulile lukiingi Sayuuni lweesi wamenyatsakakho.

³N'ushuukhe wiitse ukyeendele mu byaanyi bibyahanyukhaka; baasiku beefwe nibo babeetsa boonakisaka bibiindu byoosi bye mu Lisaayilo lyoowo Likhulu.

⁴Baasiku boowo baabuutsa nga tsitalanyi mu shifwo shoowo shikhosefu, abweenewo baahanikhawo tsipendera tsaabwe khukhwookesanisa bari nibo baawulile.

⁵Baaremaka babaandu boowo ni tsiyaywa tsaabwe baafwaana nga babaaremaka bisaala.

⁶Baafuniaakaka bibiindu bibeetse byoosi nga baraambisa tsiyaywa tsaabwe ni tsinyoondo.

⁷Baryo boosha Lisaayilo lyoowo Likhosefu ni kumulilo baalikwiisa aasi, baakhomyaasaka shiifwo mweesi bakhwisaayila iwe.

⁸Baryo belomela mu myoyo kyaabwe bari, “Kane khubahesele ilala boosi.” Kila bookhela ilala buli shifwo shoosi mu shibala mweesi besaayila Wele.

⁹Ari ifwe sikhushibonakho bubonelo bwe kamakaanga bwoosi ta, sishiiliwo umuŋoosi na mutweela uramilewo ta, ni khusiifwe mbaawo umuundu na mutweela umanyilekho imbuka shiina isi bino biliweelawo ta.

¹⁰O Wele, baasiku beefwe balyoolesa eena khuukhutsekhelela iwe bari? Balikhomelesa baryo lisiina lyoowo biifukhu byoosi?

¹¹Iwe lwashiina usila busa waalekha khukhuyeeta ta? Lwashiina iwe ufunya kumukhono kwoowo waakwiisa busa imukoongo?

¹²Ate nga iwe, Wele weefwe luundi Umuyiinga, ubeele uwula khukhwaama makiboole; nga ureera buwonesi buli aandu oosi khu shibala.

¹³Iwe niye uwawukhanisamo inyaantsa ni kamaani koowo kamakali; waaraakaka kimirwe kye kimisolo kye mu meetsi.

¹⁴Iwe waaraakaka kimirwe kye kimiremu kimiboofu[1] kikiimenya mu nyaantsa, waawayo kimibili kyakyo khuuba nga biilyo bye bisolo bibiimenya mu mubiimbi.

¹⁵Iwe weekulawo liloba aasi waareerawo tsisebele, naluundi woomelesa kameetsi kakeekha.

¹⁶Shifukhu kumuusi shiba shishoowo, ni shiilo nasho shiba shishoowo, iwe niye uwarawo inyaanga ni kumweesi mu bifwo byabyo.

¹⁷Iwe niye uwarawo tsintsakha tse shibala, naluundi waarawo biseela bye bukhafu ni biseela bye buunyifu.

¹⁸O Umukasya, n'ushebulile ubone nga baasiku boowo ni bakhutsekhelela iwe, ubone nga baasiku boowo ni bakhulekelesa.

¹⁹Ukhakhwibilila ifwe babaandu boowo beesi iwe ukana naabi, wakhuwaanayo isi baasiku beefwe baarafu ta; ukhebilila babaandu boowo babaali buubi biilo ni biilo ta.

²⁰N'ushebulile Indakaano isi iwe wakhola ni nafwe, lwekhuuba biifwo byoosi bye mushiilima bibiili mu shibala byaayitsula baasiku baarafu.

²¹Iwe ukhalekha abo babaakubyeengebwa baawulibwa namwe waabalekha baswaala ta, ne n'uyeete bataambi ni babaakhali na khaandu ta, bakhuruuye iwe lisiina lyoowo.

²²Yinyukha, O Wele, wamweene wikholelekho; n'ushebulile uri babaandu baasilisilu beelabusa antsye nga bakhutsekhelela iwe.

²³Iwe ukhebilila likono lye baasiku boowo ta, luwuungu lwe baasiku boowo lweesi benyusa buli mbuka!