Read lumasaaba Tsizabuli 75 Bible Online

Tsizabuli 75 - lumasaaba bible

Tsizabuli 75

¹Ifwe khukhusiima iwe, O Wele. Ifwe khukhusiima iwe, lwekhuuba iwe uli aambi ni nafwe. Buli muundu akanikha khu buraambi bwoowo bwe kamakaanga.

²Iwe wamweene warawo imbuka inyene, imbuka isi ulikhalilakho kimisaango mu bwaŋali.

³Shibala ni shiyeŋaana, ni babaandu banikina; iwe wamweene wenyene niye uliinda luwoongwa lwasho nga luwaangafu.

⁴Iwe wamweene ulomela abo babeyiinga uri, “Mukheyiingayiinga ta!” Waaloma baboonaki uri, “Mukheyiingayiinga lwe kamaani keenywe ta.

⁵Ni mwaakamise khukhwiyiinga; mukhakanikha luundi nga mwaleyesele kamakosi keenywe mu ngaaki ta!”

⁶Lwekhuuba mbaawo bukhulu bubwaama ibwaamanyaanga, namwe khukhwaama ibukwanyaanga, namwe mu mubiimbi ta.

⁷Ne Wele niye uuli umukayi. Umulala amukhalila kumusaango khuumufuura waamukwiisa aasi, ne ukuundi waamulekhuula waamuniinisa angaaki.

⁸Umukasya mu mukhono kweewe wahaambilemo shikhopo, nga mwetsuulemo indali indafu iye lirima lyeewe; nga waakitsukhiile baboonaki boosi be mu shibala bakinywa, bakinywa khukhwoolesa yoosi niweelawo ilala.

⁹Ne ise sindyakamisakho khuukhuboolelesa iwe, Wele wa Yakobo, na khakyeekhe khoosi ta khukhweemba nga ikhuruuya iwe ta.

¹⁰Umukasya weefwe alifuniaaka kamaani ke babaandu baboonaki, ne kamaani ke babaandu bakhosefu alikalooselakho.