Read lumasaaba Tsizabuli 76 Bible Online

Tsizabuli 76 - lumasaaba bible

Tsizabuli 76

¹Mu Yuda mwoosi, Wele waamanyikhana, ni mu Isiraeli, bamwiisamo shiriifwa.

²Tsiingo tseewe tsili mu Yerusalemu, ni bumenyo bweewe buli khu lukiingi Sayuuni.

³Ibweene iyo niyo isi Wele aafuniaakakila buyiingo bwe baasiku, ni tsingabo, ni tsiindima, ni bye busoolo byaabwe byoosi.

⁴Iwe nga uli uwe shiriifwa, O Wele, nga uli uwe shiriifwa ni lukoosi luukali khufuurisa tsinjiinji tse baasiku boowo.

⁵Baselikhale baabwe be kamaani bakwiile babayaayilekho byoosi abe byeesi bali nabyo, bakwiile aasi bakonele nga babafwiile, nga sibanyala ni khukhwinyusa kamakhono kaabwe ta.

⁶O Wele wa Yakobo, iwe ni wabariisa, tsiŋwaaŋwa ni kamakaali ni naabo babaabikyeendelakho baakwa aasi bafwaana nga babaafwiile.

⁷Iwe Wele weefwe, iwe wenyene, niye isi babaandu barya. Iwe nga waakhalaale, mbaawo n'umuundu na mutweela unyala khukhwiimikha mu moni tsoowo ta.

⁸Iwe weemikha mwikulu walaangilila khuukhala kumusaango! Shibala shoosi sharya, ni babaandu boosi basila busa

⁹iwe ni wenyukha nga umukayi, khuuwonesa abo boosi babaamiinilisibwa mu shibala.

¹⁰Ilala ikhaba ni lirima lye baasiku boowo likila babaandu baakhuruuya iwe, ni naabo babaaramakho mu busoolo balikhwisaaya iwe.

¹¹Buli muundu yeesi ukhola bisuubiso isi Umukasya Wele aakha khuubyoolelesa, lekha babaandu boosi babaali aambi bareere biwaanwa isi Umukasya lwe khuumuwa shiriifwa.

¹²Wele ekhiliisa kamaani ke baawuli ni bayiinga, waabakhola khuuba babaamurya niye.