Read lumasaaba Tsizabuli 77 Bible Online

Tsizabuli 77 - lumasaaba bible

Tsizabuli 77

¹Ise ndilila Wele ni likono lye angaaki ndi anjeete, ise ndilila Wele ni likono lye angaaki ndi nio ambuliilise.

²Mu mbuka isi ise nakaananilamo bukosi, imeentsa Umukasya; mu shilo shoosi ninyusa kamakhono kaase mu khuloomba, naloba khuyeetebwa khwoosi.

³Ise ni nakhwaambaasakho khwiiwe, O Wele, nalila kamasika; ise ni nambaasa luukali, kumwoyo kwase kuwamo kamaani.

⁴Iwe, Umukasya Wele, siwafukiilisa ise khufunyikha bisikye byase khukona liilo ta, kumutaambo kumaamba siinyala ni khuukanikha ta.

⁵Ise nambaasa naabi khu biifukhu bye khaale, nashebulila ni kimiiko kikyabira khaale.

⁶Buli shiilo shoosi ise mba mu byambaaso biikali. Nambaasa naabi samweene lwanyuma nereeba mu mwoyo kwase ndi:

⁷“Umukasya, iwe kane ukhwikaane ifwe buli mbuka? Singene ukhwookesanise ifwe shiisa shoowo luundi ta?

⁸Khuukana khwoowo khukhuukhakama ta, ari khwaweelawo ilala? Ni bisuubiso byoowo ari byaayola khukhwakama?

⁹Ari iwe Wele, waayibilila khuuba uwe shiisa? Ari lirima lyaabiimbile khu shisa shoowo shikali?”

¹⁰Lwanyuma lwashino ise nelomela ndi, “Ise shishintsiina naabi nisho shino ndi, bunyala bwa Wele Uli Angaaki Lukali bwaboomba.”

¹¹O Umukasya, ise kane ishebulile bukhulu bwe kimilimo kyeesi wakhola, kane ishebulile buraambi bwe kamakaanga bweesi wakhola khaalekho.

¹²Ise kane nambaase naabi khwiibyo byeesi wakhola, kane nambaase naabi khu buraambi bwoowo bwe kamaani.

¹³Byoositsana byeesi iwe ukhola, O Wele, bili bikhosefu. Naluundi mbaawo wele uli umukhulu nga iwe, Wele weefwe ta.

¹⁴Iwe uli Wele ukhola bye kamakaanga; naluundi wokesanisa bunyala bwoowo mu manaambo.

¹⁵Iwe wawonesa babaandu boowo, babaana ba Yakobo ni ba Yusufu, ni bunyala bwoowo bukali.

¹⁶Ni kameetsi ni kaakhubonakho khwiiwe, O Wele, kaarya naabi, kameetsi kamaleeyi naabi aasi kanikina ni khuurya khuukali.

¹⁷Lifuumbi lyaakwiisa ifula, khuukuula khuukali khwetsula mu ngaaki; ni tsisasani tse khuumulikha tsaamalatana tsimbeka tsoosi.

¹⁸Likono lye khuukuula khwoowo lyeetsila mu mbewo ingali, ni khuumulikha khwoowo khwakhosesa shibala shoosi, naluundi shibala tsana shayeŋaana luundi shanikina.

¹⁹Intsila yoowo iye khuubiriramo yaba khu nyaantsa, kumukhoosi kwoowo kwaba mu meetsi kamakali, ni isi wasaamba bikyele byoowo alekha khubonekha ta.

²⁰Iwe waraangirira babaandu boowo nga umwaayi, warobolayo Musa ni Aroni khuuba baaraangilisi baabwe.