Read lumasaaba Tsizabuli 78 Bible Online

Tsizabuli 78 - lumasaaba bible

Tsizabuli 78

¹Inywe babaandu baase, ni murekeerese khuuleekela khwase; muwuliilise bilomo byeesi ise inganikha!

²Ise kane inganikhe bilomo mu simo busa, inganikhe khu biindu bibikhamanyikhana ta, bibyabawo khaalekho.

³Bibiindu bino nibyo byeesi ifwe khwawulila luundi khwaamanya, bibiindu byeesi bakuuka beefwe baakhuboolela ifwe.

⁴Ifwe singene khubibise khuubiboolela babaana beefwe ta; ne kane khuboolele kimiboolo kikiitsa ibweeni khu buraambi bwe kamaani bw'Omukasya, ni bukhulu bweewe, atweela ni bye kamakaanga byeesi akhola.

⁵Wele aawa kamakaambila isi babaana ba Yakobo, ni biilakilo isi babaandu ba Isiraeli; aryo waalakila bakuuka beefwe khuubileekela isi babaana baabwe;

⁶nio manya kimiboolo kikiitsa lwanyuma kimanyekho kamakaambila keene, nakyo kiryo kiboolelekho babaana baabwe babeelawo lwanyuma.

⁷Nio lwanyuma musaambo iyo nabo beyikine mu Wele, balekhe khukhwibilila buraambi bwa Wele ta, ne busheele beliinde kamakaambila keewe.

⁸Baryo balekhe khuba nga bakuuka baabwe ta, babaaba babaandu baamiinyi luundi baakhawulila ta, babaakhaaba babeyikinwa isi Wele ta.

⁹Basaani ba Efurayimu babaaba baasutile buyiingo, baatitukha khu shifukhu isi busoolo bwarakikhila.

¹⁰Nibo baalekha khuliinda indakaano ya Wele ta, naluundi baaloba khukyeenda nga kamakaambila ni kaloma ta.

¹¹Baaba bebiliile byoosi byeesi aakhola, ni buraambi bwe kamakaanga bweesi aabokyesanisa.

¹²Wele aakhola bye kamakaanga mu moni tse bakuuka baabwe, mu shisiintsa sha Zowani, mu shibala sha Misiri.

¹³Wele aawukhanisamo inyaantsa khuubakholela intsila, waababirisila akari busa; waakhola kameetsi keemikha nga kuseenge kuboofu.

¹⁴Imbuka iye kumuusi aabaraangirira ni lifuumbi, ne buli shilo waabaraangirira ni buwaanga bwe kumulilo.

¹⁵Niye aakhupa lulwaanda lwaatikha mu mubiimbi, mwaamamwo kameetsi babaandu beewe baakanywa baafwaana busa nga babaanywa khukhwaama mu nyaantsa.

¹⁶Wele aarusa tsisebele tse kameetsi khuurura mu lwaanda, waatsikhola tseekha nga tsintsitsi tse kameetsi.

¹⁷Ne nibo beloosela busa khukhwooneka isi Wele, nga bamiinyaalila Uyo Uuli Angaaki Lukali.

¹⁸Nibo baashitsililila busa khuukhaka Wele mu myoyo kyaabwe, nga bakana bafune biilyo byeesi baakana.

¹⁹Baakanikha khu Wele buubi nga baloma bari, “Wele anyala khuukhuwa ifwe biilyo mu mubiimbi muno?

²⁰Ilala shili shaŋali ndi niye aakhupa lulwaanda mwaamamwo kameetsi, ni tsintsitsi tseekha. Ne anyala khuuwa babaandu beewe biilyo namwe waabawa tsinyama?”

²¹Ne Umukasya n'awulila bino waakhalala naabi, wahaanya kumulilo kweewe khu baandu ba Yakobo, ni lirima lyeewe isi babaana ba Isiraeli.

²²Lwekhuuba nibo sibaafukiilila khukhwiyikina Wele ta, naluundi balekha khufukiilila bari niye anyala khubawonesa ta.

²³Ne niye aalakila busa likulu lye mu ngaaki, wekulawo tsintsitsi tse mwikulu;

²⁴waabatsukhililakho biilyo byeesi balaanga bari imaanu khuulya, bibyeetsa khukhwaama mu ngaaki.

²⁵Babaandu busa baalya biilyo bye bamalayika, baryo Wele waabawa biilyo byeesi baakana bibibamala.

²⁶Wele lwe kamaani keewe aareera imbewo iye bwaamanyaanga khuwuutsa mu ngaaki mwikulu, naluundi ni kamaani keewe, waareera ikiindi khuurura khukhwaama imwaalo we shibala.

²⁷Aryo waareera binywiinywi bibyetsula byaamalatana buli aandu oosi, byetsula byafwaana nga kumuyekhe kwe khu nyaantsa.

²⁸Wele waareera binywiinywi byeetsa byaakwa isi babaandu beewe baamenyatsaka, khukhwibotokhelela kamasari kaabwe koosi.

²⁹Baryo babaandu beewe baalya bekurira ilala, lwekhuuba Wele aabawa bye khuulya byoosi byeesi baakana.

³⁰Ne ni baaba nga bashiilya biilyo ibyo byeesi baakana, nga bashiili na khubimila ta,

³¹Wele waabakhalalila naabi, weeramo babaandu baalala mu nibo babaaba be kamaani, basooleli babaaba baalayi mu Isiraeli.

³²Ikhaba nga bino byoosi byaba biryo, babaandu bano beloosela khukhwooneka, baalekha khukhwiyikina bye kamakaanga bya Wele ta.

³³Aryo waakhalakho biifukhu bye buulamu bwaabwe waabimbiyisa, ni khuumenya kimiiko kye buulamu bwaabwe nga bariire naabi.

³⁴Ne buli lweesi Wele eriratsakila babaandu baalala mu nibo, abo babaaramawo bebiyisatsaka baakobola luundi isi Wele ni kimyoyo kyaabwe kyoosi.

³⁵Nibo baashebulilatsaka bari Wele niye Lulwaanda lwaabwe lwe kamaani, naluundi bari Wele Uli Angaaki Lukali niye umuwonesi waabwe.

³⁶Ne bilomo byaabwe byoosi byeesi baalomatsaka byaba bye bubeeyi, nga mbaawo nashitweela shoosi sheesi baamulomela shaŋali ta.

³⁷Nibo sibaaba baŋali isi niye ta, naluundi nibo sibaaba babeyikinwa isi indakaano yaabwe ni naye ta.

³⁸Ne Wele niye eloosela khuuba uwe shiisa isi babaandu beewe, wabeyakhilatsaka bibyoonako byaabwe byoosi, walekha khubahesa ta; imbuka ifuura bukali nga akhalala, ne nga akyelawo wabiimbakho khu lirima lyeewe.

³⁹Wele ashebulila ari nibo bali babaandu buundu busa, ari bali busa nga imbewo iwuutsa ne yaakyelawo yaawawo.

⁴⁰Kimiluundi mikali baamuminyaalilatsakila naabi nga bali mu mubiimbi, baryo baaba nga bakhalasa Wele!

⁴¹Nibo baaba nga bakhaka Wele kimiluundi mikali, baryo baaba nga bakhalasa Umukhosefu wa Isiraeli.

⁴²Nibo baaba baayibilila kamaani keewe, ni shifukhu khweesi niye aabawonesela khukhwaama isi baasiku baabwe.

⁴³Wele okesanisa bye kamakaanga byeewe bibikhali bitweela ta mu Misiri, ni bye khukhwiyaangisa mu mubiimbi kwa Zowani.

⁴⁴Niye aakalusa tsintsitsi tsaabwe tse kameetsi khuuba kamafuki; Ba Misiri baalekha khunyala khuunywa kameetsi kaabwe ta.

⁴⁵Aryo waabasiindikhila kumutuuli kwe tsisame khuubalumaka, ni tsinjele tsitsabareerera khuutaambisibwa khuukali.

⁴⁶Wele aabasiindikhila tsiisike khuulya bilime byaabwe, ni neebyo byoosi byeesi baaraambilila mu mikuunda kyaabwe byoonakisibwa.

⁴⁷Aryo waahesa kimisabibu kyaabwe ni kamararara, ni kimisaala kyaabwe kimifigi waakihesa ni kamabaale ke kamararara.

⁴⁸Naluundi waahesa ni tsikhaafu tsaabwe ni kamararara, ni bibyaayo byaabwe bibiramile waabihesa ni khuubalukha khwe fula.

⁴⁹Wele waabakhalalila naabi ni lirima lyeewe lyaaba liikali, aryo mu burafu ni khuurunya khuukali waabakholesaka shiisa luukali nga abarumanila liiye liikali lye bamalayika babareera khuuhela.

⁵⁰Wele alekhuulila ilala lirima lyeewe lyoosi, waalekha khubalekhawo khuuba baalamu ta, ne waabahesa nibo ni luufu lurafu lulwakwawo.

⁵¹Aryo waahesa babaana besiinde baakiboole be babaandu boosi khukhwaama mu buli muungo mu shibala she Misiri.

⁵²Aryo lwanyuma waraangirira babaandu beewe nga umwaayi n'akhola khuubarusa mu Misiri, wabaayilisa wabaraangirira nga kamasheese khubira mu mubiimbi.

⁵³Niye aabaraangirira mu lukoosi baalekha khuubakho ni khuurya khwoosi ta, ne baasiku baabwe boosi bahelela mu nyaantsa.

⁵⁴Wele waabareera mu shibala sheewe shikhosefu, mu shibala isho she tsingoongo sheesi umweene erobolela ni kumukhono kweewe kwe kamaani.

⁵⁵Umweene waatimisa kamanaambo kakaaba mu shibala umwo khuurura, aryo waashikabananisamwo bisiintsasiintsa waareera babaana ba Isiraeli khuushimenyamwo.

⁵⁶Ne nibo baakhaka Wele uli Angaaki Lukali, baamuminyaalila baalekha khuwulila kamakaambila keewe ta.

⁵⁷Nibo sibaaba babeyikinwa ta, baaminyaala nga bakuuka baabwe ni baaba, sibeyikinikha ta bafwaana busa nga luyiingo luluborokhele.

⁵⁸Lwe biifwo byaabwe byeesi baarawo khukhwisaayilamo bifwaani, nibo baakhalasa Wele, baryo benyusa libuba lyeewe lwe bifwaani bino.

⁵⁹Naye Wele n'abona aryo waakhalala naabi, wesisakulila ilala, wekaana babaandu ba Isiraeli.

⁶⁰Aryo waantsukha iweema yeewe iyaba i Shilo, iweema isi aamenyatsakamwo akari mu baandu beewe.

⁶¹Waalekha baasiku beewe khuuwaamba Isanduuku yeewe iye Ndakaano khuukiyila mu bubowe, ni shiriifwa she bunyala bweewe shaayilibwa mu makhono ke baasiku.

⁶²Wele aawaanayo babaandu beewe isi lirima, ni lwe khuukhalala khuukali wabahaanayo nibo khukhwiiribwa ni baasiku.

⁶³Kumulilo kwahesa basooleli baabwe, ni bakhaana baabwe bataamba basaani babaabakhwa.

⁶⁴Basaayi baabwe beeribwa ni lurima, ni banamulekhwa baabwe sibaabafukiilila khuulila ta.

⁶⁵Ne lwanyuma Umukasya waasisimukha busa nga uwinyukha mwiilo, waalookha nga umusaani uwe kamaani umeelile lwe ndali.

⁶⁶Aryo waasalanisa baasiku beewe baatitukha, waabahaambisa tsisoni tse biilo ni biilo.

⁶⁷Ndi lwanyuma Umukasya wekaana khuumenya akari mu betsukhulu ba Yusufu, waalekha khurobola shikuuka sha Efurayimu ta;

⁶⁸ne waarobola shikuuka sha Yuda, naluundi waarobola Lukiingi Sayuuni lweesi akana naabi.

⁶⁹Ibweene iyo wombekhayo Lisaayilo lyeewe Likhulu khuuba nga muungo mweewe mwe mwikulu, waalihangasa nga shibala sheesi aakhola khuumenyawo biilo ni biilo.

⁷⁰Umukasya Wele aarobola Dawudi khuuba umwakaanisi weewe, waamurusa mu khwaayisa kamasheese;

⁷¹khukhwaama mu khulolelela kamasheese, Wele waamureera khuraangilila babaandu beewe ba Isiraeli, linaambo lyeewe lilyeene.

⁷²Dawudi waabaayilisa ni kumwoyo mutweela, waabaraangirira ni kamakyesi kamakali.