Read lumasaaba Tsizabuli 79 Bible Online

Tsizabuli 79 - lumasaaba bible

Tsizabuli 79

¹O Wele, kamanaambo kaaluumbile shibala she buusikha bwoowo, boonakisile Lisaayilo lyoowo Likhosefu, baakwiisile Yerusalemu aasi.

²Baawaanileyo kimilaambo kye babaakaanisi boowo khuuba biilyo isi tsingosya, ni kimibili kye bakhosefu boowo isi tsisolo tse mu kyeewa.

³Baatsukhile kamafuki kaabwe nga kameetsi, kaamalataane khukhwibotokhelela Yerusalemu, mbaawo n'umuundu namutweela uramilewo khuusiikha kimilaambo kyaabwe ta.

⁴Ifwe khwekyelile busa she khuukhomebwa isi babesanwa beefwe, abo babaakhwibotokheleele bakhutsekhelela luundi bakhutyaabila busa.

⁵Iwe ulyoolesa eena, O Umukasya? Kane ube mukhalafu biifukhu byoosi? Kane lirima lyoowo lilooselele ilala liryo khuutindiima nga kumulilo?

⁶N'utsukhe lirima lyoowo khu manaambo ako kakaakhakhumanyile iwe ta, ni khu buyiinga ubwo bubukhakhwisaaya iwe ta.

⁷Lwekhuuba baahesele babaandu ba Yakobo boosi, ni shibala shaabwe shoosi baashoonakisiile ilala.

⁸Ukhakhuwa ifwe shitaambiso lwe bibyoonako bye bakuuka beefwe ta. N'ukhuwaambile ifwe shiisa wiitse khaangu ukhuyeete, lwekhuuba khwaweelelemo ilala kumwiyikino.

⁹O Wele, Umuwonesi weefwe, n'ukhuyeete ifwe, lwe buulayi bwe lisiina lyoowo; n'ukhuwonese naluundi ukhwiyakhile ifwe bibyoonako byeefwe lwe khuureera shiriifwa isi lisiina lyoowo.

¹⁰Lwashiina kamanaambo kanyala khuukhureeba ifwe kari, “Wele weenywe ali waheena?” Khayo ifwe khubone naluundi boosi bashibone, nga iwe wiliyaasa kamanaambo, nga ukawa shitaambiso lwe khuutsukha kamafuki ke babaakaanisi boowo.

¹¹Khali khukhwilootsa khwe baabowe khwoolile isi uli, ni khulwe kamaani koowo, uwonese abo babaakhalibwiile kumusaango kwe khuufwa.

¹²O Umukasya, iwe n'uwiliyaase kimiluundi musaafu isi kamanaambo ako kakaakhukhomyaasa iwe.

¹³Nio lwanyuma ifwe babaandu boowo, ifwe kamasheese ke mu maayilo koowo, khukhusiimatsake biifukhu byoosi; khukhwaama khu muboolo mutweela khukhwoola khu kuundi kane khukanikhe bye khuukhuruuya iwe.