Read lumasaaba Tsizabuli 8 Bible Online

Tsizabuli 8 - lumasaaba bible

Tsizabuli 8

¹O Umukasya, iwe Umukasya weefwe, nga lisiina lyoowo lili likhulu naabi mu shibala shoosi! Shiriifwa shoowo shiruuyibwa khukhwoola mwikulu.

²Nisho shikila batsweenge ni babaanuuna baaruuya ni kiminwa kyaabwe. Iwe waayiyombekhelakho lumako khukhwiwonesa isi baasiku boowo, ni khukhwakamisa buli muundu yeesi ukhukhaandisa.

³Ise naasamiliile busa lwe khukhwiyaanga, nga naalolile mu ngaaki mwikulu lyeesi wakhola ni kamakhono koowo, ni kumweesi ni tsinieniesi byeesi warawo.

⁴Umuundu niye shiina iwe khuumwaambaasakho, namwe iwe khukhwiinaanayo isi ifwe babaandu buundu busa?

⁵Ne bona isaambo isi iwe wamubuumbamo, waamurakho liyabi lye shiriifwa ni lukoosi, ataambakho khakyeekhe alekhaane ni nawe Wele.

⁶Wamuwa bunyala khuuwula bibiindu byoosi byeesi iwe wakhola ni kamakhono koowo, waara bibiindu byoosi mu bunyala bweewe.

⁷Kamasheese koosi ni tsikhaafu, ni tsisolo tsoosi tse mwirome natso,

⁸ni binywiinywi bye mu ngaaki, ni tsinyeeni tse mu meetsi, ni bibuumbe byoosi bibiili mu nyaantsa waabira mu bunyala bweewe.

⁹O Umukasya, Mukasya weefwe, nga lisiina lyoowo lili likhulu naabi mu shibala shoosi!