Read lumasaaba Tsizabuli 80 Bible Online

Tsizabuli 80 - lumasaaba bible

Tsizabuli 80

¹O Umwaayi wa Isiraeli, n'ukhuwuliilise ifwe, iwe uraangilila babetsukhulu ba Yusufu nga uraangilila kamasheese! Iwe uwikhaale khu shitsoloŋo shoowo khu bakerubi,[2] niwaburukhe, ubonekhe

²wiyokesanise wamweene isi bikuuka bya Efurayimu, Benyamini ni Manase. Niwiyokesanise kamaani koowo, wiitse ukhuwonese.

³O Wele, n'ukhukobosele ifwe tsikhabi tseefwe khube nga nikhwabatsaka khaale; n'ukhwookesanise khuukana khwoowo khuukali, ukhuwonese ifwe.

⁴Umukasya Wele unyala byoosi, ulyoolesa eena khuukhalalila khuuloomba khwe babaandu boowo?

⁵Wakhuwa ifwe kamasika khuulya mu shifwo she biilyo, naluundi wakhuwa ifwe shikhopo shishitsufu she kamasika khuunywa.

⁶Iwe wakhwikyelisa ifwe busa khuuba she khuukhomebwa isi babesanwa beefwe, ni baasiku beefwe bakhutsekhelela busa.

⁷O Wele Umunyali wa byoosi, n'ukhukobosele tsikhabi tseefwe nga nikhwabatsaka khaale, n'ukhwookesanise khuukana khwoowo khuukali, ukhuwonese ifwe.

⁸Ifwe khuli nga kumusabibu kweesi warusa khukhwaama i Misiri; watimisa kamanaambo kakaandi khuururawo, nio waakubyaala ano.

⁹Iwe waŋoonaŋoona liloba khulwakwo, ni nakwo kweekhisa kimili kyakwo mwiloba aasi, kwaabalaaha kwaamalatana shibala shoosi.

¹⁰Shishisiisa khukhwaama khu kuusaala kuno shaabiimba tsinjiinji, khuufuurisakho ni kimiruumba kye kamaani ni tsisakya tsakyo.

¹¹Kwabalaayisa tsisakya tsakwo khukhwoolela ilala khu nyaantsa Meditereniani, ni khuutsya khukhwoolela ilala khu luutsi Efulaati.

¹²Umukasya, lwashiina iwe wafuniaaka lumako lulwakwibotokhelela? Lwekhuuba ari buli muundu ubira khu ntsila abutakho bibyaamo byakwo.

¹³Tsimbiitsi tse mushaali tsiitsa tsaakulya tsaakumalawo, ni tsisolo tse mwirome tsikulyakho.

¹⁴O Wele Umunyali wa Byoosi, n'ushuukhe ubekho ni sheesi ukhola! N'ulole aasi nga wiima angaaki mwikulu ubone; n'ubone shishiili khukholekha khu kusabibu kuno.

¹⁵Kumusabibu kweesi wamweene wabyaala ni kamakhono koowo, kumweene kuno kweesi wamweene watsowesa khuuba kukwoowo.

¹⁶Baasiku baaremile kumusabibu baakukwiisile aasi, baakwooshile ni kumulilo, n'ubalolelele ni lirima lyoowo ubahese.

¹⁷Ne khayo kumukhono kwoowo kwe kamaani kuyeete uyo uwikhala khu mukhono kwoowo kumulayi, uyo isi iwe wamweene watsowesa khuuba uwoowo.

¹⁸Ni nafwe khuryo singene khukhururekho taawe. N'ukhukobosemo bulamu buyaakha, ni nafwe kane khukhwisaayatsake.

¹⁹O Wele Umunyali wa byoosi, n'ukhukobosele tsikhabi tseefwe nga nikhwabatsaka khaale, n'ukhwookesanise khuukana khwoowo khuukali, ukhuwonese ifwe.