Read lumasaaba Tsizabuli 81 Bible Online

Tsizabuli 81 - lumasaaba bible

Tsizabuli 81

¹Nimuyokese ni kumwikhoyo isi Wele ukhuwa ifwe kamaani! Ni mwiimbe ni kamaani khuuruuya Wele wa Yakobo.

²Nimurakikhe kumweenya nga musakayisa bibisakaya, ni mukhupe lituungu ni ndingiti lwe kumweenya.

³Ni mufuure tsikhoombi, murakikhe khukhwinyaha lwe khubonekha khwe kumweesi kumushaakha, naluundi mwikhoye nga kumweesi kwatsowele.

⁴Lino lili likaambila mu Isiraeli, shili shilakilo khukhwaama isi Wele wa Yakobo.

⁵Likaambila lino aliwa isi babetsukhulu ba Yusufu khuulifukiilila. Shino shaba nga Wele n'abaraangirira khuurura mu shibala she Misiri. Mu lulimi lweesi ise ikhaamanya ta, nawulila likono nga liloma liri:

⁶“Ise nakhurusakho busiro bubwaba khwibeka lyoowo, nakhulekhuula khukhwaama mu busiro bweesi wabamo.

⁷Nga niwaba mu mutaambo kwoowo, waantsilootsela ni nase naakhuwonesa. Ise nakhwiilamo nga niima mu shifwo she lifuumbi ni khuukuula khwe ifula; lwanyuma nakhutsemela khu meetsi ke Meriba.

⁸Nimuumbuliliise inywe babaandu baase, nga ise Umukasya weenywe imbakaambilila! O Isiraeli, muba nga mufukiilila khali mumbuliilisile ise!

⁹Ikhabatsakawo wele ukuundi akari musiinywe ta; mukhesaayatsakakho ba wele babaandi beesi mukhamanyile ta.

¹⁰Ise ndi Umukasya Wele weenywe, uwabamusa inywe khukhwaama mu shibala she Misiri. Nimwasame mukhanwa mweenywe, ni nase kane imbaliise.”

¹¹“Ne babaandu baase sibaakana khukhuumbuliilisa ise ta, Isiraeli s'akana khukhwiwaanayo isi ndi ta.

¹²Ni nase indyo nabalekha khuuloondelela bye bumiinyi bwaabwe, ni khuukhola ibyo byeesi babeene baakana.

¹³Abe iba nga babaandu baase ba Isiraeli babaambuliliisa ise baloondelela tsintsila tsase!

¹⁴Khali nawula baasiku baabwe khaangu naabi, khali nabatimisa ni kumukhono kwase kwe kamaani.

¹⁵Abo boosi babaabiyila Umukasya khali beetsile is'ali nga baafulila busa aasi, ni shitaambiso shaabwe shaandibeelewo biilo ni biilo.

¹⁶Ne ise khali imbaliisile ni biilyo bibiiminya buulayi, imbekusa ni bubuushi bwe ntsukhi bubufuurira ilala.”