Read lumasaaba Tsizabuli 83 Bible Online

Tsizabuli 83 - lumasaaba bible

Tsizabuli 83

¹O Wele, iwe ukhasila busa uryo ta! Iwe ukhabuna busa, waataambakho she khuukhola ta, O Wele!

²Bona! Baasiku boowo nga basakalaaye; abo babaakhubiyila iwe baasutile kimirwe kyaabwe mu ngaaki.

³Bakhalila babaandu boowo tsimbomelo; bateesela atweela lwe khuuhesa babaandu boowo beesi iwe uliinda.

⁴Baloma bari, “Nimwiitse khwoonakise linaambo lyaabwe; ilekhe khubawo namutweela ushebulila lisiina lya Isiraeli ta!”

⁵Boosi bafukiilisanila atweela ni kumwoyo mutweela, betubaasila atweela mu mbomelo tsaabwe, nga mu nibo mulimo:

⁶babaandu ba Edomu ni ba Isimaeli, ba Mowabu ni ba Hagura,

⁷babaandu ba Gebali ni ba Amoni, ni ba Amaleki, ba Firisitiya, atweela ni babekhali be Tuulo.

⁸Ni ba Asiriya nabo baayitubaasa ni nabo, bakhola liihe lye kamaani ni babetsukhulu ba Loti.

⁹N'ubakhole nibo nga niwakhola ba Midiyani, nga niwahesa Sisera ni Jabini khu luutsi Kishoni,

¹⁰bano babahelela aambi ni Endori, ni kimilaambo kyaabwe kyabolela khwiloba.

¹¹N'ubirise baraangirisi baabwe nga ni wakhola Orebu ni Zeebu, uwule baawuli baabwe nga ni wakhola Zeba ni Zalumuna.

¹²Bano boosi nibo babaaloma bari, “Kane khwiyilile fwabeene buusikha buno, liiloba lya Wele libe lilyeefwe.”

¹³O Wele wase, n'ubasalanise bafwaane nga lifukhuulu ni likhuutsi lyeesi imbewo isuta yaatamuusa.

¹⁴Nga n'ubona kumulilo ni kwoosha shisaali, nga kumulilo ni kumemukha kwoosha khu ngoongo,

¹⁵nawe uryo n'ubatimise batsye ni shiriisa, ubariise ni ikhuungu yoowo.

¹⁶N'ubafuunikhilile mu moni tsaabwe ni tsisoni, nio lwanyuma beetse khukhwisaaya iwe, O Umukasya.

¹⁷Lekha baswaale luundi bakaraangarane busa. Lekha bahelele ilala mu mutaambo.

¹⁸N'ubakhole bashimanye bari iwe niye Umukasya, Uli Angaaki Lukali, bari iwe wenyene niye uwula shibala shoosi!