Read lumasaaba Tsizabuli 84 Bible Online

Tsizabuli 84 - lumasaaba bible

Tsizabuli 84

¹O Umukasya Wele Umunyali wa Byoosi, Lisaayilo lyoowo Likhulu nga liilayi!

²Nga buulamu bwase bwikoomba naabi khuubayo mu Lisaayilo lyoowo Likhulu; ni kumwoyo kwase kwoosi ni kumubili kwase niimbila Wele umulamu kimyeenya lwe kumwikhoyo.

³Abe ikhaba ni namundyoole naye wayoombekha shiiswi aambi ni shisheeso shoowo, ni naakholo naye waayoombekha awo, isi aliindila bubwaana bweewe. O Umukasya Wele Umunyali wa Byoosi, iwe uli Umuyiinga wase luundi uli Wele wase.

⁴Nga bali ni tsikhabi abo babaamenya mu Lisaayilo lyoowo Likhosefu, nga busheele beemba kimyeenya kye khuukhuruuya iwe.

⁵Nga bali ni tsikhabi babaandu abo babaafuna kamaani khukhwaama is'uli, babewuuma khuukyeenda khuutsya khu lukiingi Sayuuni.

⁶Nga ni baba babira mu litila lya Baka, balikhola lyekyela khuuba shiifwo she tsisebele, ni ifula inyoowa ilikhola lyetsula ni kamatibo.

⁷Batsya beloosela busa khuuba ni kamaani; naluundi iwe Wele we ba wele ulibonekhela mu Sayuuni.

⁸O Umukasya Wele Umunyali wa Byoosi, n'uwulile khuuloomba khwase; n'undekeerese, O iwe Wele wa Yakobo.

⁹O Wele, iwe uli ingabo yeefwe, n'ulole ni khuukana khu murobole woowo.

¹⁰Shifukhu shitweela mu Lisaayilo lyoowo Likhulu shifuura biifukhu shikana shitweela bimalibwila akhuundi busa. Shifuura buulayi khukhwiimikha nga uliinda khu mulyaango kwe ntsu ya Wele, khufuurisa khuumenya mu ntsu tse baboonaki.

¹¹Umukasya Wele niye ali nga inyaanga luundi ali nga ingabo; niye akhubiimbakho ni shiisa ni lukoosi. Niye mbaawo shishiindu shoosi shilayi sheesi emana isi abo babaakhola biilayi ta.

¹²O Umukasya Wele Umunyali wa byoosi, nga ali ni tsikhabi umuundu ukhwiyikina iwe!