Read lumasaaba Tsizabuli 85 Bible Online

Tsizabuli 85 - lumasaaba bible

Tsizabuli 85

¹O Umukasya, iwe wokyesanisa bubweela bwoowo isi shibala shoowo; waakobosela Yakobo tsikhabi tseewe.

²Iwe waayiyakhila babaandu boowo bibyoonako byaabwe, waabeyakhilila ilala buubi bwaabwe bweesi baakhola.

³Iwe warusawo buurafu bwoowo bwoosi, waakamisa lirima lyoowo lye kamaani.

⁴O Wele umuwonesi weefwe, n'ukhukobosewo luundi, urusewo naluundi umalilewo ilala lirima lyoowo.

⁵Iwe kane ukhukhalalile ifwe uryo biifukhu byoosi? Kane ukhuwaambile ifwe lirima kimiboolo kyoosi?

⁶Iwe singene ukhwiisemo ifwe kamaani buyaakha ta, nio nafwe babaandu boowo khwikhoyele musiiwe?

⁷N'ukhwokyesanise ifwe khuukana khwoowo khukhuukhakama ta, O Umukasya, ukhuwe ifwe buwonesi bwoowo.

⁸Ise kane imbuliilise byeesi Umukasya Wele kane alome, lwekhuuba niye asuubisa lukoosi isi babaandu beewe bakhosefu, abo boosi babaali babeyikinwa babaakhelayo mu bumoyaani ta.

⁹Ilala niye weerekekhele khuuwonesa abo babaamwiisamo shiriifwa, nio lubuyi lweewe lubewo mu shibala sheefwe.

¹⁰Khuukana ni bubwiyikinwa kane byakaanane; bukwalaafu ni lukoosi kane bitubaane atweela.

¹¹Bubwiyikinwa kane burure bwaamile aasi khukhwaama khwiloba, ni bukwalaafu kane bulole aasi khukhwaama mwikulu.

¹²Ilala Umukasya kane akhuwe ibyo bibiili biilayi, ni shibala sheefwe kane shikhuwe kumusalo kwe biilyo.

¹³Bukhosefu kane bumuraangilile ibweeni weewe, bumukwalaasile intsila iye khukyeendelakho.