Read lumasaaba Tsizabuli 86 Bible Online

Tsizabuli 86 - lumasaaba bible

Tsizabuli 86

¹N'uwuliilise, O Umukasya, untsilemo khuuloomba khwase, lwekhuuba indi umutaambi naluundi siindi n'unjeeta ta.

²N'uliinde buulamu bwase luundi umbonese lwekhuuba ise ikhuwulila iwe. N'umbonese ise lwekhuuba indi umwakaanisi woowo umwiyikinwa.

³N'umaambile ise shiisa, O Umukasya, lwekhuuba ise ikhuloomba iwe shifukhu shoosi.

⁴N'uwikhoyese buulamu bw'omwakaanisi woowo, O Umukasya, lwekhuuba isi iwe indeera khuuloomba khwase khwa ŋali.

⁵Lwekhuuba iwe uli Umulayi isi khuli luundi uli umwiyakhili, O Umukasya, iwe waayitsula khuukana khukhuukhakama ta isi abo boosi babaakhuloomba iwe.

⁶Wulila khuuloomba khwase, O Umukasya, wuliilisa khuuloomba khwase khwe buyeeti.

⁷Khu shifukhu khweesi imbeela mu bikosi, ise ikhwilootsela iwe lwekhuuba iwe untsilamo.

⁸Mbaawo mu ba wele babaandi uli nga iwe ta, O Umukasya, naluundi mbaawo ukhola buraambi bwe kamakaanga nga iwe ta.

⁹Kamanaambo koosi keesi iwe wabuumba kaliitsa kafukhamile is'uli, O Umukasya, keename aasi khuukhwisaaya iwe.

¹⁰Lwekhuuba iwe uli umukhulu naluundi ukhola buraambi bwe kamaani, iwe wenyene niye uli Wele.

¹¹N'undeekele intsila yoowo, O Umukasya, nio nase inyale khukyeendela mu bwaŋali bwoowo; indeekele khukhwakaanisa iwe ni kumwoyo mutweela.

¹²Ise kane ikhusiime iwe ni kumwoyo kwase kwoosi, O Umukasya Wele, naluundi kane inganikhe khu bukhulu bwe lisiina lyoowo biilo ni biilo.

¹³Nga khuukana khwoowo khuukali isi ise! Lwekhuuba wambonesele buulamu bwase khukhwaama imakoombe.

¹⁴O Wele, babaandu baabi luundi be shikili baantsibotokheleele ise; ni lituuli lye babaandu be bisaayumba babaakhakhwiinaanayo khwiiwe ta, baabusaane bakana khukhuuntsira ise.

¹⁵Ne iwe, O Umukasya, uli Wele uwe shiisa luundi uwe bubweela, uli umwikhaliliikhi uwitsuule khuukana khukhuukhakama ta ni bubwiyikinwa.

¹⁶N'ushuukhile ise umaambile shiisa; umbe ise umwakaanisi woowo kamaani luundi umbonese.

¹⁷N'untsokese ise khaabonelo khe buulayi bwoowo, nio abo babaambiiyila ise bakhaabone baswaale busa, lwekhuuba iwe waanjeetile luundi waantsisilemo kamaani.