Read lumasaaba Tsizabuli 88 Bible Online

Tsizabuli 88 - lumasaaba bible

Tsizabuli 88

¹O Umukasya Wele, iwe niye uwumbonesa ise, ikhulilila shifukhu shoosi, shiilo ni kumuusi ikhulilila iwe.

²Lekha khuuloomba khwase khwoole is'uli, uwuliilise khuulila khwase!

³Lwekhuuba buulamu bwase bwetsuule kumutaambo, ni nase ndi aambi khukhwiikhilila i makoombe.

⁴Ise imbalibwila atweela ni naabo babeekha imakoombe; ise ndi umuundu ukhalimo kamaani ta.

⁵Ise naalekhebwele atweela ni baafu, naafwaanile nga uwiiribwile naalisibwa mu ŋani, isi ukhashebulilakho na khakyeekhe ta, lwekhuuba s'ushinjeeta ta.

⁶Iwe waandekhile ise mwilowo lileeyi naabi, mu shiilima namukoto she aasi naabi.

⁷Lirima lyoowo liikali lyangoneele naabi, lyafwaanile nga ikhuungu iye khu nyaantsa.

⁸Iwe waakilile basaale baase baantsawukhilekho lwekhuuba ise naabasinyile. Ni nase ndi umubowe mu mureko siinyala naatitukha ta.

⁹Tsimoni tsase tsibofwaala lwe kumutaambo. O Umukasya, ise ikhulilila buli shifukhu; nga ninyusa kamakhono kaase is'uli mu khuloomba.

¹⁰Iwe ukhola bye kamakaanga lwe baafu? Manya baafu benyukha aasi bakhuruuya iwe?

¹¹Khuukana khwoowo khukhuukhakama ta bakhukanikhakho i makoombe? Namwe bubwiyikinwa bwoowo babukanikhakho iyo mu bafu?

¹²Manya bye kamakaanga byoowo bimanyikha mu shifwo she shishiilima? Namwe buraambi bwoowo bukhosefu isi abo beesi baamala khaale khukhwibilila?

¹³Ne ise, O Umukasya, ikhulilila iwe lwe buyeeti; buli mutikhinyi khuuloomba khwase khwiitsa is'uli.

¹⁴Umukasya, iwe lwashiina untsikaana ise? Iwe lwashiina undekha ise?

¹⁵Ise khukhwaama mu bwaana bwase mbeele mutsiina khukhwoola aambi ni khuufwa; iwe waayintsiinisa naabi naawamo kamaani.

¹⁶Lirima lyoowo lirafu lyaantsutsukhilekho, ni buurafu bwoowo bwaamaliilewo ise ilala.

¹⁷Byaakhupile khukhuuntsibotokhelela nga ikhuungu iye kamaani khuumala shifukhu shoosi, byaasangiliile tsimbeka tsoosi.

¹⁸Iwe waakilile basaale baase ni babesanwa beene baandurirekho, ari naaramile ni shishiilima shonyene nga nisho umusaale wase.