Read lumasaaba Tsizabuli 89 Bible Online

Tsizabuli 89 - lumasaaba bible

Tsizabuli 89

¹O Umukasya weefwe, ise kane niimbatsake kimyeenya busheele lwe khuubuyila khuukana khwoowo khukhuukhakama ta; ise kane inganikhatsake khu bwiyikinwa bwoowo bumanyikhane mu miboolo kyoosi.

²Ise ndibaboolela ndi khuukana kwa Wele khumenyawo biilo ni biilo, ni bubwiyikinwa bweewe bwahangasibwa nga likulu lilyeene.

³Iwe waaloma uri, “Nakhola indakaano yase n'umwakaanisi wase umurobole, nalayilila Dawudi umwakaanisi wase

⁴ndi ‘Indikila lisaaye lyoowo nga bayiinga liimikhewo biilo ni biilo, naluundi ndiliinda buyiinga bwoowo mu miboolo kyoosi.’ ”

⁵Lekha bye mwikulu byoosi ari byeembe lwe bye kamakaanga byoowo, O Umukasya, ni bakhosefu boowo beembe lwe khuuruuya bubwiyikinwa bwoowo.

⁶Mbaawo na mutweela khuubo babaamenya mwikulu unyala wafwaananisibwa ni nawe ta, O Umukasya. Mbaawo nashitweela khu bye mwikulu shishilekhaana n'Umukasya ta.

⁷Mu lubusano lwe bakhosefu mwikulu Wele ali ni shiriifwa shiibiririfu, boosi babaamwibotokhelela bamwiisamo lukoosi lubiriirifu naabi.

⁸O Umukasya Wele Umunyali wa byoosi, mbaawo uuli nga iwe ta! Mbaawo uuli ni khuukana ni bubwiyikinwa nga iwe ta.

⁹Iwe uwula khukhwilyebula khwe kameetsi, naluundi ni kaba nga kayilila iwe ukasilisa.

¹⁰Iwe wawula kuusolo kukulaangibwa Rakabu waakuhesa ni kamaani koowo, uryo waasalanisaka baasiku boowo.

¹¹Likulu lili lilyoowo, ni shibala nasho shili shishoowo; shibala ni neebyo byoosi bibishilimo, iwe niye uwabibuumba.

¹²Iwe uwabuumba ingaaki we shibala ni mwaalo we shibala weene, lukiingi Tabori ni lukiingi Herumoni tsikhwiimbila lwe kumwikhoyo.

¹³Iwe nga uli uwe kamaani! Nga kumukhono kwoowo kumulayi kuli kwe kamaani!

¹⁴Bukwalaafu ni bwaŋali nibyo bibyeemisawo Buyiinga bwoowo, khuukana khuukali ni bubwiyikinwa nibyo bibiili iburaangisi woowo.

¹⁵Bali ni tsikhabi abo boosi babaamanyile khuukhwiimbila iwe kimyeenya, O Umukasya, abo babaakyeendela mu buwaanga bwe shiisa shoowo.

¹⁶Nibo bekhoya khulwe lisiina lyoowo biifukhu byoosi; naluundi bakhuruuya lwe bukwalaafu bwoowo.

¹⁷Iwe ubawa nibo bunyala bwe kamaani kamakali; ni lwe shiisa shoowo kamaani kaabwe keloosela.

¹⁸Ilala, Umukhosefu wa Isiraeli, Umukasya weefwe luundi Umuyiinga weefwe, niye ingabo yeefwe.

¹⁹Mu mbuka iye khaale wakanikha isi babaakaanisi boowo babeyikinwa mu marooro nga uloma uri: “Naaweele buyeeti isi umuselikhale we kamaani; naaniinisile angaaki uyo isi narobola khukhwaama mu baandu baase.

²⁰Nangala Dawudi umwakaanisi wase khuuba nga umuyiinga, namuwakha kamafura kamakhosefu naamurobola.

²¹Ni kumukhono kwase kwe kamaani kane kubatsake ni naye busheele, khuumuwaangasa ni khuumwiisamo kamaani.

²²Mbaawo umusiku na mutweela ukane amuwule ta, namwe baboonaki singene banyale khuumukwiisa aasi ta.

²³Ise ndisaambakilila baasiku beewe imbakwiise aasi, naluundi niire buli musiku yeesi uwamubiiyila niye.

²⁴Bubwiyikinwa bwase ni khuukana khwase khukhuukhakama ta kane khubatsake khu niye, ni nase kane imuwe kamaani ke khuuwula.

²⁵Kane imunyalisise khuuwula kamanaambo khukhwaama khu nyaantsa khukhwoola khu ntsitsi tse kameetsi.

²⁶Niye alilaangilila angaaki nga anomela ari, ‘Iwe uli Paapa wase luundi uli Wele wase, uli lulwaanda lwase lwe buwonesi.’

²⁷Ni nase kane imwikyelise umusooleli wase umukiboole, naye kane abe umuwuli khuufuura bayiinga boosi be khu shibala.

²⁸Khuukana khwase khukhuukhawawo ta kane khubatsake khu niye biilo ni biilo, ni indakaano yase ni naye singene iwewo ta.

²⁹Kane imaangase buyiinga bweewe bubeelelewo biilo ni biilo, ni lisaaye lyeewe liliwula khukhwoolesa likulu ni liliwawo.

³⁰Ne babaana be mu lisaaye lyeewe ni balilekha khuuwaamba kamakaambila kaase, baalekha khukaloondelela,

³¹namwe ni baliminyaalila kamakaambila kaase, baalekha khukawaamba ta,

³²nase ndibawa shitaambiso nga inaambisa imiimbo iye shishuuma, luundi imbatsiinise naabi lwe bibyoonako byaabwe.

³³Ne sindyakamisa khuukana Dawudi ta, naluundi indiliinda ni bubwiyikinwa bukali isho sheesi namulomela.

³⁴Ise siindifuniaaka indakaano yase ni naye ta, namwe siindishuusamo ilomo yoosi isi ise namulomela ta.

³⁵Nalayiliile ilala kumuluundi mutweela kwonyene mu lisiina lyase likhosefu, indi siindiwombesakho isi Dawudi ta.

³⁶Lisaaye lyeewe silikhaawewo biilo ni biilo ta, ni buyiinga bweewe bulibeelelawo khukhwaama nga inyaanga nishaaburukha;

³⁷bukhaamenyelewo ilala nga kumweesi ni kubonekhela mu ngaaki.”

³⁸Ne ari iwe bona waakhalalila umurobole woowo, waamwirusakho luundi waamuloba.

³⁹Iwe wakhalamwo indakaano yoowo n'umwakaanisi woowo, naluundi waayonakisila ilala buyiinga bweewe.

⁴⁰Iwe wafuniaakila ilala tsimako tseewe tse shiriimba, ni biifwo byeewe bye khukhwiliinda byaayonakisibwila ilala.

⁴¹Abo boosi babaabirawo bamwiibakho byoosi byeesi bakana, naluundi waayikyela busa she khuutsekhelelwa isi babesanwa beewe.

⁴²Iwe waayikyelisa baasiku beewe khuuba be kamaani, naluundi wabakhola nibo khuuba ni kumwikhoyo.

⁴³Ilala iwe wakalusile lurima lweewe khuuba lulukhalimo ta, lwekhuuba iwe siwamuyeeta niye mu busoolo ta.

⁴⁴Iwe wamalilawo ilala luubuyi lweewe, waakwiisa shitsoloŋo sheewe aasi.

⁴⁵Iwe waboombesakho biifukhu bye busooleli bweewe, waamubiimbakho ni tsisoni.

⁴⁶O Umukasya, ulyoolesa eena? Ulyoolesa liina khukhwiibisa uryo? Ulyoolesa eena lirima lyoowo khuutindiima liryo nga kumulilo?

⁴⁷N'ushebulile ubone nga buulamu ni buli bukyeekhe! Nga ni wabuumba babaandu khuuba babaweelawo ilala!

⁴⁸Muundu shiina unyala khuubawo mulamu waalekha khufwa? Namwe naanu unyala waawonesa buulamu bweewe khukhwaama imakoombe?

⁴⁹O Umukasya, khuukana khwoowo khuukali khukhwanyoowa khuli eena, khweesi wetsubila Dawudi mu bwiyikinwa bwoowo?

⁵⁰O Umukasya, n'ushebulile ubone khuukhomebwa khw'omwakaanisi woowo, ubone nga ise ninekhaliilikha khuukhomebwa khwe kamanaambo.

⁵¹Ise ndi umurobole woowo, ne bona baasiku boowo bandimisa ise. Luundi bakhomaka buli isi intsya yoosi.

⁵²Umukasya aruuyibwe biilo ni biilo! Amiina luundi Amiina.