Read lumasaaba Tsizabuli 9 Bible Online

Tsizabuli 9 - lumasaaba bible

Tsizabuli 9

¹O Umukasya, kane ise ikhusiimatsake iwe ni kumwoyo kwase kwoosi. Kane ise imboolelesatsake buraambi bwoowo buulayi bwe kamakaanga bwoosi.

²Ise kane nikhoyatsakile luundi niitikitilatsakile mwiiwe, kane niimbatsake kimyeenya khuubuyilisa lisiina lyoowo, Iwe uli angaaki luukali.

³Iwe nga waabonekhele, baasiku baase batima belukha, baakwa aasi luundi baahela.

⁴Lwekhuuba iwe mu khukhala kimisaango khwoowo uli uwa ŋali; wikhala khu shitsoloŋo shoowo waakhala kimisaango mu bwa ŋali washifuumbula uri ise siindikho ni kumusaango ta.

⁵Iwe wakhookhela babaandu be kamanaambo, waahesa abo babaali baboonaki; singene bamanyikhanekho luundi biilo ni biilo ta.

⁶Baasiku beefwe baweelelewo ilala biilo ni biilo; waasambulakile biriimba byaabwe, singene abewo ubashebulila luundi ta.

⁷Ne Umukasya niye ali Umuyiinga biilo ni biilo; waarekekhawo shitsoloŋo sheewe khweesi akhalila kimisaango.

⁸Niye awula shibala shoosi mu bukwalaafu, akhalila kamanaambo koosi kumusaango mu bwa ŋali.

⁹Umukasya niye Lumako luwaangafu lulweene lw'abo babaakubyeengebwa, niye isi belukhilayo mu mbuka iye bikosi.

¹⁰Ni naabo babafukiilila mwiiwe, O Umukasya, bakhwiyikina iwe, lwekhuuba iwe siwayantsukhakho abo babeetsa is'uli ta.

¹¹Ni mwiimbe nga muruuya Umukasya, niye uwikhala mu Sayuuni! Ni muboolele kamanaambo koosi buraambi bweewe buulayi!

¹²Lwekhuuba Wele ashebulila abo boosi babataambisibwa; niye s'ebilila khuulila khwaabwe ta, naluundi awa shitaambiso abo babaabakholakho buubi.

¹³O Umukasya, n'umaambile ise shiisa, n'ubone isaambo isi abo babaambiyila baantsiinisamo, n'umbonese ise indekhe khuutsya imakoombe ta.

¹⁴Nio nase inyale khukhwiimikha khu ngaaki ni khuuruuya lubuyi lwoowo akari mu baandu be mu Yerusalemu. Inyale khukhwikhoya lwekhuuba iwe wambonesele ise.

¹⁵Babaandu be kamanaambo bakwiile mu malowo keesi babeene bayaba, bawaambikhiile mu mireko kyeesi babeene baareka.

¹⁶Umukasya umweene weyokesaniile mu khukhala kimisaango mu bukwalaafu, ni babaandu baabi bawaambikhiile mwiibyo byeesi babeene baakhola.

¹⁷Babaandu baabi boosi, ni naabo babekaana Wele, baliitsya mu khuhela.

¹⁸Ne bataambi niye alibashebulila biifukhu byoosi, ni kumwiyikino kweesi babaandu be aasi bali ni nakwo singene kuwewo ta biilo ni biilo.

¹⁹Yinyukha, O Umukasya, ukhalekha babaandu baakhulekelesa baryo ta; reera babaandu be kamanaambo koosi mu moni tsoowo ubakhalile kumusaango.

²⁰O Umukasya, n'ubariise! Lekha babaandu bamanye bari nibo bali babaandu buundu busa.