Read lumasaaba Tsizabuli 90 Bible Online

Tsizabuli 90 - lumasaaba bible

Tsizabuli 90

¹O Umukasya, iwe ubeelatsakile nga bubwikhalo bweefwe bwe lukoosi mu miboolo kyoosi.

²Khukhwaama nga tsingoongo tsishiili khubuumbibwa ta, namwe nga ushiili khubuumba shibala ta, khukhwaama liina na liina, iwe ubeelatsakile Wele.

³Iwe ulakila babaandu khukhwiilayo mwiloba, nga ubalomela uri, “Nimwiileyo mwiloba, inywe babaana be babaandu.”

⁴Kimiiko shikana shitweela kili busa nga shifukhu she ngoloobe shishamalile khubirawo, namwe nga tsisaawa njeekhe tsiri tse mu shilo.

⁵Iwe urusawo buulamu bweefwe khuubumalawo, khumenyawo khakyeekhe nga kamarooro. Ifwe khuli busa nga bunyaasi bubuurura kumutikhinyi,

⁶bubuutsowa luundi bwaamulisa buulayi, ne butsya khwilabula, nga bwaaniaalile luundi bwoomele.

⁷Lirima lyoowo likhumalawo ifwe, nga iwe waakhalaale ifwe khwiyembelela.

⁸Iwe waamanya bibyoonako byeefwe byoosi, bibyoonako byeefwe bye mu shimoonyo isi iwe bili busa bya lubuula.

⁹Bulamu bweefwe buweelela bwaaba bwiimbi busa lwe lirima lyoowo, butsya bwaawawo busa nga khukhwikhiliisa shikhoowe.

¹⁰Buleeyi bwe biifukhu byeefwe buli kimiiko kamakhumi musaafu, namwe kamakhumi shinaane nga khushiili ni kamaani. Ne ni kimiiko kyeene kikhureerera busa kumutaambo ni butsiina. Khaangukho imbuka yeefwe ikhuwakho, khwaakoraanawo.

¹¹Naanu uwamanyakho kamaani ke lirima lyoowo? Lirima lyoowo lili likhulu naabi nga khuurya khweesi khuba nakhwo is'uli.

¹²N'ukhuleekele khuuraambisa biifukhu byeefwe buulayi, nio khunyale khufuna kumwoyo kwe kamakyesi.

¹³N'ukhuyeete, O Umukasya! Iwe kane wolise liina? Khuwaambile shiisa, ifwe babaakaanisi boowo.

¹⁴N'ukhwikuse ifwe ni khuukana khwoowo nga bushiili mutikhinyi. Nio lwanyuma nafwe khwiimbe lwe kumwikhoyo biifukhu byoosi bye buulamu bweefwe.

¹⁵Ari n'ukhuwe ifwe kumwikhoyo kukuulekhaana ni butsiina bweesi wakhuwa, kumwikhoyo kukuulekhaana ni kumutaambo kweesi ifwe khwabona.

¹⁶N'ukhwookesanise ifwe babaakaanisi boowo buuraambi bwoowo bwe kamaani, ni buunyala bwoowo bwe shiriifwa bubonekhele babaana beefwe.

¹⁷O Umukasya, luundi Wele weefwe, khali buulayi bwoowo bubeele khus'ifwe, uwaangase buuraambi bwe kamakhono keefwe. Ilala buuraambi bwe kamakhono keefwe khali ubuwaangasile!