Read lumasaaba Tsizabuli 91 Bible Online

Tsizabuli 91 - lumasaaba bible

Tsizabuli 91

¹Buli muundu yeesi umenya aasi e buliindi bwa Wele Uli Angaaki Lukali; buli uyo yeesi urama mu shiniini sha Wele Umunyali wa byoosi,

²anyala khuulomela Umukasya ari, “Iwe niye umuliindi wase, luundi uli shiifwo shase mweesi nibisa; Wele wase isi niyikina.”

³Umukasya kane akhuliinde iwe khukhwaama isi kimireko kye mu shimoonyo, ni khukhwaama isi buulwaale buubi naabi.

⁴Kane niye abalaayise tsindaaha tseewe khuukhubiimbakho iwe, akhuliinde buulayi. Bubwiyikinwa bweewe buli nga ingabo khuukhuliinda iwe.

⁵Iwe singene ubekho ni khuurya bukosi bwe mu shilo ta, namwe buyiingo bubwiitsa kumuusi.

⁶Naluundi singene ube ni khuurya buulwaale bubuubalukhawo mu shiilima, namwe bukosi bubuukwawo mwihangilwe ta.

⁷Babaandu shikana shitweela shinyala shaakwa aambi ni nawe, ni kumukaanda mutweela kwaakwa khukhwibotokhelela, ne mbaawo bubukane bukhwiitseyo isi iwe ta.

⁸Iwe ulilola busa, lwanyuma ubone shitaambiso sheesi baboonaki bafuna.

⁹Lwekhuuba iwe wekyelisile Umukasya khuuba bubwilukhilo bwoowo, uyo Uuli Angaaki Lukali, khuuba bumenyo bwoowo,

¹⁰nashiryo mbaawo bukosi bubulikhwiitsayo ta, mbaawo buwaangafu bubuliitsa aango owo ta.

¹¹Wele alilakila bamalayika beewe bakhuliinde iwe, bakhutseete buli aandu oosi isi utsya.

¹²Balikhusuta angaaki mu makhono kaabwe, iwe ulekhe khukhwikuunya shikhaandakilo shoowo khwibaale ta.

¹³Iwe ulisambakilila tsitalanyi ni tsindemu, ulikhaandakilila tsitalanyi tsindafu ni tsindemu tse buutwa.

¹⁴Umukasya aloma ari, “Lwekhuuba iwe ungana ise, waayimanya lisiina lyase, nashiryo kane ikhuwonese, ikhuliinde ube buulayi.

¹⁵N'uba nga uli mu bukosi, n'ukuukuule isi indi, kane imbe ni nawe luundi ikhwiilemo, nase kane ikhutseete luundi ikhuwe shiriifwa.

¹⁶Kane ikhunyalise umenyewo bulamu buleeyi, naluundi ikhwookesanise buwonesi bwase.”