Read lumasaaba Tsizabuli 92 Bible Online

Tsizabuli 92 - lumasaaba bible

Tsizabuli 92

¹Nga shifuura buulayi khuusiima Umukasya, ni khukhwiimba kumweenya khuuruuya lisiina lyooyo Uuli Angaaki Lukali!

²Shili shilayi khuukanikha khu khukana khwoowo khukhuukhawawo buli kumutikhinyi, ni angoloobe khuruumbula bubwiyikinwa bwoowo.

³Khuraambisa tsiindingiti khuukhupa kumweenya, ni khuurusa kamakona ke kamatuungu.

⁴Lwekhuuba buraambi bwoowo, O Umukasya, buntsikhoyesa ise luukali, nashiryo ise niimba kumweenya ni kumwikhoyo lwe buraambi bwoowo.

⁵Buuraambi bwoowo nga buli bukhulu, O Umukasya, bibyambaaso byoowo nga bili bye mukari aleeyi naabi!

⁶Umuundu ukhalimo kamakyesi s'amanya ta, umuundu umusilu s'anyala wamanya ta.

⁷Abe yakhaba nga babaandu baabi barura babalaaha nga bunyaasi, baaba buulayi mu byeesi bakhola, ne khuuhela khwe biilo ni biilo khuba khwaabaliindiliile.

⁸Ne iwe, O Umukasya, uli umuwuli umukhulu biilo ni biilo.

⁹Lwekhuuba ilala baasiku boowo baliihelela ilala, O Umukasya, abo babaakhola bubwoonaki balisalanisibwa.

¹⁰Iwe waambeele ise kamaani kakaafwaana nga ke mboko, naluundi waantsukhilekho kamafura khukhuundobora ise khuuba uwoowo ilala.

¹¹Ni tsimoni tsase, ise naboone baabi nga bawulibwa, ni kamaru kaase, ise naawuliile kumutaambo ni khuhela khwe baasiku baase.

¹²Babaandu bakhosefu balibalaaha babe nga kuusaala kwe kamasheendu, balitsowa babe be kamaani nga kimiruumba kya Lebanooni.

¹³Bali nga kimisaala kikyabyaalibwa mu ntsu y'Omukasya, baryo batsowa babalaayila mu Lisaayilo lya Wele.

¹⁴Ni mu makoro kaabwe baana bibyaamo, baarama nga bashibonekha buulayi luundi be kamaani.

¹⁵Balirama nga baloma bari, “Umukasya ali Umukwalaafu; Wele niye ali lulwaanda lweefwe, naluundi mu niye mbaamo buubi bwoosi ta.”