Read lumasaaba Tsizabuli 94 Bible Online

Tsizabuli 94 - lumasaaba bible

Tsizabuli 94

¹O Umukasya, iwe Wele uwa shitaambiso isi abo beesi shaakhila. Iwe Wele niwokyesane lirima lyoowo, ubonekhane.

²Iwe ukhalila shibala shoosi kumusaango, nuwinyukhe ukhuyeete ifwe. Nuwiliyaase babaandu babeyiingayiinga isho shishibaakhila nibo.

³O Umukasya, baboonaki balyoolesa eena khukhwikhoya? Nibo balyoolesa eena khukhwinyaha baryo?

⁴Nibo bekhala baalomaka kamalomo ke shikili, babaandu baabi abo beyiinga luundi beebuyila busa.

⁵Nibo bamalilawo ilala babaandu boowo. O Umukasya, nga bamiinilisa abo babaali busikha bwoowo!

⁶Nibo beera banamulekhwa ni babaandu babaali bakyeni busa, baatubakho ni naabo babaali baafuubi.

⁷Nibo belomela babeene bari, “Umukasya s'anyala washibona ta, Wele wa Yakobo s'anyala washimanyakho ta.”

⁸Inywe babaandu babaakhalimo kamakyesi, simunyala mwamanya ta? Inywe babaandu basilu, muliyika liina?

⁹Wele uwakhurakho ifwe kamaru ke khuuwulila, niye umweene s'awulila ta? Uyo uwakhurakho ifwe tsimoni, niye umweene s'abona ta?

¹⁰Uyo urafuyila kamanaambo, s'anyala waakawa shitaambiso ta? Uyo umweene uleekela babaandu boosi, anyala wataambamo khuumanya?

¹¹Umukasya waamanya bibyambaaso bye babaandu, waabimanyila ilala nga nibili bibiikhalimo ta.

¹²O Umukasya, nga bali ni tsikhabi babaandu beesi iwe uleekela, abo boosi beesi iwe uleekela nga uraambisa kamakaambila koowo!

¹³Iwe ubawa nibo khuuwola khukhwaama mu bikosi byaabwe, khukhwoolesa lilowo lye baabi nililimala khuuyabibwa.

¹⁴Lwekhuuba Umukasya s'anyala waantsukhawo khuulekha babaandu beewe ta, niye s'alilekha abo babaali barobole beewe ta.

¹⁵Khuukhala kumusaango khwa ŋali khulibawo khulwe bakwalaafu, ni naabo babaakhola biilayi balikhuuloondelela.

¹⁶Naanu uliinyukha antsimilewo khuukhaandisa babaandu baabi? Naanu uliimikhawo khuukhaandisa abo babaali baboonaki?

¹⁷Iba nga Umukasya ukhaanjeeta ise ta, khali naayikha khaangu naabi mu shibala shishasila busa she makoombe.

¹⁸Ise ni naaba nga ndi khuureremukha ntsya khukwa, O Umukasya, iwe lwe khuukana khwoowo khuukali weetsa waamaambiliila waantsimisa.

¹⁹Ne ni naba nga netsuule bibyambaaso bye khuurya mu mwoyo kwase, iwe waantsisamo kamaani, newulila kumwikhoyo.

²⁰Iwe s'utubaana ni baawuli babaakhali baŋali ta, namwe abo babaakhola bubuukhali bwaŋali mu makaambila ta.

²¹Nibo batubaana atweela baakhalila babaandu baalayi luwomelo, bakhalila babaandu babaakhalikho ilomo yoosi kumusaango kwe khuufwa.

²²Ne iwe Umukasya, niye umuliindi wase. Iwe Wele niye lulwaanda mweesi ise nibisa.

²³Iwe ulisasula baasiku baase lwe buubi bwaabwe, naluundi ulibahesela ilala lwe bumoyaani bwaabwe. Iwe Umukasya Wele weefwe, ulibamalilawo ilala.