Read lumasaaba Tsizabuli 95 Bible Online

Tsizabuli 95 - lumasaaba bible

Tsizabuli 95

¹Nimwiitse khwiimbile Umukasya kimyeenya kye kumwikhoyo! Khakhwiimbile Wele ukhuliinda ifwe buulayi, ni likono lye angaaki.

²Khakhwiitse mu moni tseewe ni khuusiima, khumwiimbile kimyeenya kye kumwikhoyo kye khuumuruuya.

³Lwekhuuba Umukasya niye Wele Umukhulu naabi, niye ali umuyiinga umukhulu khuufuura ba wele boosi.

⁴Niye uwaambiliile kumusiinji kwe shibala shoosi kukuuli aasi naabi ni kamakhono keewe, ni khu ngaaki khwe tsinjiinji nakhwo khuli khukhweewe.

⁵Ni nyaantsa imboofu nayo ili iyeewe, lwekhuuba niye uwakikhola; ni kamakhono keewe niko kakaakhola ni lulwoomu lwe shibala.

⁶Nimwiitse khwiiname aasi khumwisaaye, khakhufukhamile mu moni ts'Omukasya, Umubuumbi weefwe!

⁷ Lwekhuuba niye ali Wele weefwe, ni nafwe khuli babaandu beewe beesi ayilisa, kamasheese keesi alolelela mu maayilo keewe. Shaandibeele shilayi muwuliilise likono lyeewe shilayi!

⁸Mukhahangasa kimyoyo kyeenywe nga bakuuka beenywe ni baashikholela i Meriba[3] ta, namwe nga nibamiinyaalila i Masa mu mubiimbi ta.

⁹Mu miiko kamakhumi kane, bakuuka beenywe bakhaka ise luundi bantsema, abe yakhaba nga baabona kumulimo kweesi ise nabakholela nibo.

¹⁰Mu miiko kamakhumi kane, ise naakhalalila kumuboolo ukwo, nabalomela ndi, “Bali babaandu babaaborokha, bashiili khumanya sheesi ise ingana khukhola ta.”

¹¹Shikila mu bukhalafu bukali, ise nabetsubila, nga isuubisa ndi; “Sibalinjila mu shiwolelo shase nakhakyeekhe khoosi ta.”