Read lumasaaba Tsizabuli 96 Bible Online

Tsizabuli 96 - lumasaaba bible

Tsizabuli 96

¹Nimwiimbile Umukasya kumweenya kumushaakha! Inywe shibala shoosi, ni mwiimbe khuruuya Umukasya.

²Ni mwiimbile Umukasya kumweenya mumuruuye niye. Buli shifukhu ni mumuboolelese muri, “Umukasya wakhuwonesile ifwe!”

³Ni muboolele kamanaambo koosi bye shiriifwa sh'Omukasya, ni buraambi bweewe bubwiyaangisa muburumbule isi babaandu boosi.

⁴Umukasya ali umukhulu naabi, nashiryo akhila khuruuyibwa khwoosi! Niye ali Wele uwakhila khubwiyilisibwa angaaki khufuura ba wele babaandi.

⁵Lwekhuuba ba wele be kamanaambo kakaandi bali bisaambwa busa, ne Umukasya niye uwabuumba likulu.

⁶Shiriifwa ni bukhulu byamwibotokhelela niye, kamaani ni buulayi byayitsula mu Lisaayilo lyeewe Likhosefu.

⁷Inywe babaandu boosi be mu shibala, ni muruuye Umukasya, ni muruuye shiriifwa sheewe ni kamaani keewe.

⁸Ni muwe Umukasya shiriifwa shishaakhila khuweebwa lisiina lyeewe, mureere shiwaanwa nga mwiitsa mu Lisaayilo lyeewe Likhosefu.

⁹Ni mwisaaye Umukasya mu mbonekha yeewe iye bukhosefu, munikine mu moni tseewe, inywe shibala shoosi!

¹⁰Ni muboolele kamanaambo koosi muri, “Umukasya niye umuyiinga. Shibala shahangasibwa sishinyala shayeŋaana ta, niye umweene alikaya babaandu beewe mu bwaŋali.”

¹¹Lekha likulu likhoye! Ni shibala nasho shitikitye! Lekha ni nyaantsa nayo ni neebyo bibikilimo bilomakhane.

¹²Lekha ni kimikuunda nakyo kiikhoye atweela ni bilimwa bibiikilimo. Ni kimisaala kye mu shisaali kyoosi kiimbe kimyeenya kye kumwikhoyo

¹³nga Umukasya wetsile. Lwekhuuba niye ali khukhwiitsa khuuwula babaandu boosi be mu shibala mu buulayi ni bwaŋali bwoosi.