Read lumasaaba Tsizabuli 97 Bible Online

Tsizabuli 97 - lumasaaba bible

Tsizabuli 97

¹Umukasya niye Umuyiinga! Nuwikhoye, iwe shibala! Lekha ni bibala bibyesaane ni tsinyaantsa biitikitye!

²Namufweeli ni shishiilima namukoto byaamwibotokheleele, ni shitsoloŋo sheewe shaayimikha khu bukwalaafu ni khu bwaŋali.

³Kumulilo kumuraangilila iburaangisi weewe, kwaatsya nga kwoosha baasiku beewe khu buli lubeka lwoosi.

⁴Khuumulikha khweewe khumulisa shibala shoosi, ni shibala shabona luundi shanikinaka busa.

⁵Tsinjiinji tsiyengukhaka busa nga bunini ibweeni w'Omukasya, Umukasya uli uwe shibala shoosi.

⁶Likulu lilaangilila bukwalaafu bw'Omukasya, ni babaandu boosi babona shiriifwa sheewe.

⁷Abo boosi babesaaya bifwaani bikhalimo ta, bawaambisibwa tsisoni baswaala busa, ni ba wele babaandi bewunamila aasi isi Umukasya.

⁸Babaandu be mu Sayuuni basangaala, ni biriimba bya Yuda bikhoya lwe buukayi bwoowo, O Umukasya.

⁹Lwekhuuba iwe Umukasya, uwula shibala shoosi, naluundi uli umukhulu naabi mu shiriifwa khufuura ba wele babaandi boosi.

¹⁰Umukasya akana abo babaabiiyila shiibi, niye akhiinga babaandu beewe babaali babeyikinwa, naluundi abawonesa khukhwaama mu mukhono kwe baboonaki.

¹¹Kumuumu kwaaburukhila abo babaali bakwalaafu, ni kumwikhoyo kuba isi abo babaali baalayi mu mwoyo.

¹²Inywe babaandu bakwalaafu mweesi nimwikhoye khulw'Omukasya, ni mwitikitye luundi muruuye lisiina lyeewe likhosefu.