Read lumasaaba Tsinikha 1 Bible Online

Tsinikha 1 - lumasaaba bible

Tsinikha 1

¹Tsinikha tsa Solomoni, umuyiinga wa Isiraeli, umusooleli wa Dawudi.

²Tsinikha tsikhuleekela khuuba ni kamakhula, ni khukhwiyika, ni saambo iye khuumanya biilomo bye kamakyesi ke mukari.

³Tsikhuleekela khukhwiyika isaambo iye khuumenya nga ukhola buulayi, mu bwilama, mu bwaŋali, ni khuutubaana.

⁴Tsinikha tsiyeeta umuundu uwa busheele khukhwiyika khuuba ni kamakhula, ni khuuleekela basooleli khuuba ni khuumanya ni kamakyesi.

⁵Tsiyeeta n'umuundu uwamala khaale khuuba ni kamakhula naye eloosele khukhwiyika, ni nooyo uuli umuleekele eloosele khuuyeetebwa,

⁶khuumanya buulayi shiina sheesi tsinikha ni bibikanikhibwa bino bimanyisa, ni khuumanya tsilomo tse kamakyesi ni kiminayi.

⁷Khuurya Umukasya ni khuumwiisamo lukoosi nimwo mweesi kamakhula karakikhila; ne basilu balekelesa kamakhula ni khukhwiyika khweene.

⁸Mwaana wase, uli ni khuwuliilisatsaka byeesi paapa woowo akhuleekela, naluundi ukhalekelesa byeesi maayi woowo akhuboolela ta.

⁹Lwekhuuba khuuleekela khwaabwe khuli lihabi khu murwe kwoowo lilibonekha buulayi khu murwe kwoowo, namwe khuli bubuuma bwe mu milo bubuukhubonesa iwe buulayi.

¹⁰Mwaana wase, babaandu baboonaki nga baakhukhongelesile, ukhabawuliilisatsaka ta.

¹¹Banyala baakhulomela bari, “Yiitsa khutsye khutubaane atweela khwiire umuundu! Khakhutsye khwibuulile umuundu khumwibwakale, kube kumwinyawo kweefwe!

¹²Khayo khufwaane busa nga kamakoombe khutsye khubamile nga bashiili baalamu, nibo bafwaane busa nga babaali khuukwa mu ŋani!

¹³Nio khufune bye buyiindifu bibikhali bitweela ta, khwitsuse tsiintsu tseefwe ni byeesi khubanuulilekho!

¹⁴Yiitsa ukhwitubaasekho, kane khukabanane byeesi khunafuna.”

¹⁵Mwaana wase, ukhatsya waaloondelela babaandu babaafwaana nga abo, namwe waakhola nga nibo ni bakhola ta.

¹⁶Nibo sibakyelewakho khuukhola shishiindu shiibi ta. Bayubakilisa khaangu khuutsya khwiira umuundu.

¹⁷Lwekhuuba sishiyeeta khuureka kumureko nga khanywiinywi kheesi uli khuurekela khaloleleele ta,

¹⁸ne babaandu bano bali khukhwiirekela babeene kumureko, balikho bebuula, ne babeene batsya khwiiyira.

¹⁹Iyo niyo isaambo isi babaandu be bibituluungu befunilamwo bibyaabwe lwe buubi, ne bibituluungu byeene bibamalawo babeene.

²⁰Kamakhula kakuukuula ni likono lye angaaki mu nguudo, naluundi kakuukuulila angaaki mu bifwo bye kamakulaanilo,

²¹kakuukuulila khu ngaaki khu bilibwa bye biriimba, buli aandu oosi isi babaandu benjilila baabuusana, kaaloma kari:

²²Inywe babaandu baasilu, kane mwoolese eena, khukhwiloosela nga muli baasilu? Kane mwiiloosele muryo khuukhola bye buusilu? Baasilu bakhoolese eena khuulekelesa khuumanya?

²³Ari ni mundekeerese nga ni mbakolomosa, bona ise ndi khuubawa kamakyesi, luundi imbokyesa byeesi nambaasa.

²⁴Ise imbeele nga imbekhuunga, ne inywe mwekaana khuurekeeresa, nareera kumukhono kwase ndi imbakaanile, ne inywe mwaalekha khwiinaanayo ta,

²⁵mwalekelesela ilala khuukaambila khwase, naluundi mwaalekha khukana khuurekeeresa khuureewula khwase ta.

²⁶Nashiryo, nikane mube nga muli mu biwaangafu, kane imbatsekhelele busa, kane imbakhweenule nga mwoolile khuububukhana lwe buukosi bwe kamaani bubuunaboolakho.

²⁷Siinga khuububukhana ukhwo khuboolakho lwe buukosi buukali bubuuli nga luwuutse, nio mutaambataambe, mubonabone.

²⁸Nio isho shikile muntsikhuunge, ne nase singene iŋamule ta. Mukhaameentse buli aandu oosi, ne simukhaambonekho ta.

²⁹Lwekhuuba mwakhalawo mwaloba kamakyesi, mwalobela ilala khuukhalawo khuurya Umukasya ta.

³⁰Mwalobela ilala khuuwuliilisa khuukaambila khwase, mwekaanila ilala khukhuundekeeresa nga imbareewula.

³¹Nashiryo kane mulye bibyaamo bye buraambi bweenywe, khukhwoolesa khu mbuka isi kane tsiŋoonaŋoona tseenywe tsinyene tsibasinye.

³²Babaandu babaakhali ni khuumanya ta bahela, lwekhuuba baborokha baalekha kamakhula, ni baasilu bahela lwe khuulekha khwiinaanayo ta.

³³Ne umuundu yeesi urekeeresa byeesi ise inoma kane abe buulayi. Kane abe mu buulamu buulayi, nga s'alikho ni shishiindu shoosi shishimuriisariisa ta.