Read lumasaaba Tsinikha 10 Bible Online

Tsinikha 10 - lumasaaba bible

Tsinikha 10

¹Tsino tsili tsinikha tsa Solomoni. Umwaana uwe kamakhula ekhoyesa paapawe, ne umwaana umusilu areerera maayi weewe kumutaambo.

²Bye buyiindifu byeesi ufunila mu ntsila tsiimbi, sibukhuyeeta ta, ne buukwalaafu buwonesa buulamu bwoowo.

³Umukasya s'afukiilisa babaandu bakwalaafu khuuba intsala ta, ne abo babaali baboonaki s'abafukiilisa khuufuna byeesi bakana ta.

⁴Khuuba umutoro khureera butaambi, ne khuuraamba ni kamaani khureera buyiindifu.

⁵Umwaana uwe kamakyesi atsya waakyesa biilime nga imbuka ye khuukyesa yoolile, ne uyo ufuura busa liilo mu mbuka iye likyesa areera kumutaambo.

⁶Babaandu bakwalaafu bafuna tsikhabi, ne biilomo bye babaandu baabi bireera bituluungu.

⁷Babaandu baalayi babashebulila khuuba be tsikhabi, ne abo babaali baabi babebilila khaangu naabi.

⁸Umuundu uwe kamakyesi awuliilisa byeesi bamulakila, ne uyo ukyeendelela mu busilu atsya mu khuhela.

⁹Umuundu ukyeenda nga etsiliilisa, akyeenda buulayi, ne uyo uutsya khu kumukhoosi kukukhali kwa ŋali imbuka yoola baamuwaamba.

¹⁰Umuundu ukyeenda nga aminamina tsimoni lwe buubi, areera buwaangafu, ne uyo uwikiitsa mu lubuula, areerawo lukoosi.

¹¹Biilomo bibirura khukhwaama mu khanwa kh'omuundu umukwalaafu bireera buulamu, ne buubi bwiibisa mu biilomo by'omuundu umubi.

¹²Shiibiyile shireera khuutabukha, ne khuukana sikhwiloolelesa bibiindu biibi byeesi babaandi bakhola ta.

¹³Umuundu uwe kamakyesi akanikha bye kamakyesi, ne uyo uuli umusilu ali ni khuufuna shitaambiso.

¹⁴Babaandu bakyesi bafuna kamakyesi koosi keesi bakana, ne abo babaali baasilu nga baakanikhile, baareera buukosi bwonyene.

¹⁵Buyiindifu buli she khukhwikhiinga isi bayiindifu, ne butaambi buhesa abo babaali bataambi.

¹⁶Kumukabo kwaabo babaakhola bye buukwalaafu nibwo buulamu buulayi, ne isi abo babaakhola buubi, kumukabo kwaabwe nisho shishoonako.

¹⁷Umuundu ufukiilila baamwikiitsa khuumukolomosa, aba ali khu mukhoosi kwe buulamu, ne uyo ukhafukiilisa baamwikiitsakho ta, aborokha busa.

¹⁸Umuundu yeesi ubisabisa shiibiyile, aba ali umubeeyi, ni nooyo ukyesaasa lukaambo ali umusilu.

¹⁹Umuundu ukanikhaka naabi biilomo biikali, enyoola nga woonakisile. Ne uyo unyoowa khusilamwo, waambaasa khu sheesi atsya khukanikha, ali umukyesi.

²⁰Biilomo bibyaama mu khanwa kh'omuundu umukwalaafu bili busa nga ifeetsa indayi, ne bibyambaaso by'omuundu umubi sibilimwo kumukaso ta.

²¹Biilomo bibyaama mu khanwa kh'omuundu umukwalaafu biyeeta babaandu baakali, ne baasilu bahela lwe khuulekha khuba ni kamakyesi ta.

²²Tsikhabi tsitsaama isi Umukasya tsikhureerera buyiindifu, mbaawo kumutaambo kukwiitsilamwo ta.

²³Shili nga she kumwinyawo busa umuundu umusilu khuukhola shishoonako, ne umuundu yeesi uuli ni kamakyesi ewulila buulayi nga waakholile shishiindu she kamakyesi.

²⁴Shishiindu sheesi umuundu umwoonaki arya naabi nisho shishiitsya khumwoolakho, ne umuundu umukwalaafu atsya khufuna sheesi ewotooma naabi.

²⁵Nga ikhuungu ingali yeetsile, babaandu baboonaki bayilibwa ni nayo, ne abo babaali bakwalaafu barama baalamu nga beenyweesile ilala.

²⁶Ukharumanatsaka umuundu umutoro khuukhukholela kumulimo ta, lwekhuuba akhutsiinisa busa wafwaana nga n'unywa she khuunywa shirafu shaakhutsiinisa kameeno, namwe nga lisuusi mu moni tsoowo!

²⁷Mu khurya Umukasya, bifukhu byoowo biilooselakho byaaba biikali. Ne kimiiko kye baboonaki kikhalikhakho kyaaba miimbi kiri.

²⁸Kumwiyikino kw'omuundu umukwalaafu kureera kumwikhoyo, ne khuuliindiilila khwe baboonaki mbaawo sheesi khuureera ta.

²⁹Umukasya niye she khukhwikhiinga she kamaani isi abo babaali bakwalaafu, ne ahesa abo babaakhola bye bubwoonaki.

³⁰Mbaawo unyala waarusawo umuundu umukwalaafu mu shifwo sheewe ta, ne baabi singene bamenyewo mu shibala ta.

³¹Biilomo byeesi umuundu umukwalaafu akanikha bireera kamakhula, ne luulimi lulurusa bye buusilu luli ni khuubowebwakho.

³²Babaandu bakwalaafu baamanya isho shishaakhila khuukanikha, ne baasilu bakanikha buli mbuka biilomo bibitsiinisa.