Read lumasaaba Tsinikha 11 Bible Online

Tsinikha 11 - lumasaaba bible

Tsinikha 11

¹Umukasya s'akanilakho ilala umuundu uraambisa iminzaani ilyakhana babaandi ta, ne bipima bibiili bya ŋali nibyo bibimwikhoyesa.

²Khukhwiyiinga khuukali khureera khuuswaala. Nashiryo shiba she kamakyesi waaba umuwolu.

³Umuundu ukhola shishiindu shiilayi, bwaŋali nibwo bubuumuraangilila. Ne abo babaakhola bye bubeeyi, bayilibwa ni bubeeyi bwaabwe bwaabahesa.

⁴Buyiindifu sibuwonesa umuundu yeesi khu shifukhu she kumusaango ta, ne bukwalaafu buwonesa umuundu khukhwaama mu khufwa.

⁵Bukwalaafu bw'omuundu ukhalikho kumusaango ta bumwaayilisa khu mukhoosi kwa ŋali, ne baboonaki bahela lwe buubi bwaabwe.

⁶Bukwalaafu buwonesa abo babaali bakwalaafu, ne abo babaakhali babeyikinwa ta bawaambikhila mu muluungo kwaabwe.

⁷Umuundu umwoonaki nga waafwiile, kumwiyikino kweewe nakwo kuhela, ni khusuubila khweesi asuubila khuweelawo ilala.

⁸Babaandu bakwalaafu bawonesebwa khukhwaama isi buukosi, ne baabi batsya baabukwamwo busa.

⁹Babaandu babaakhali baakwalaafu baraambisa lukaambo khuhesa babesanwa baabwe, ne babaandu bakwalaafu bawonesebwa lwe kamakyesi.

¹⁰Siinga babaandu bakwalaafu bibiindu bibatsiila buulayi, shiriimba shoosi shisangaala, ne nga abo babaali baabi bahelile, ibawo kumwikhoyo.

¹¹Nga babaandu bakwalaafu baloombeele shiriimba tsikhabi, shitsowatsowana, ne shiriimba shihela lwe biilomo bye babaandu baboonaki.

¹²Umuundu utsya nga alekelesa uwashe, aba s'ali ni kamakyesi ta, ne umuundu uuli ni khuumanya, asila busa.

¹³Umuundu utsya nga asalaasa lukaambo, s'abiikha bimoonyo ta, ne uyo uuli umwiyikinwa, abiikha bimoonyo.

¹⁴Linaambo lihela lwe khuutaamba baaraangilisi be kamakhula, ne nga abeelewo baawi be kamakhula baakali, abawo lukoosi.

¹⁵Umuundu uwihaanayo khukhwiimilila umuundu isi akhamanyile ta, lwe kamakobi keewe, afuna buwaangafu, ne uyo ukhabiingilamwo ta, aba buulayi.

¹⁶Umukhasi umwilama afuna shiriifwa, ne umukhasi ukhali umwilama awaambisa kamaŋaanyu. Babaandu batoro sibalifuna buyiindifu ta, ne babaandu babakumila khu lomo bafuna buyiindifu bwonyene.

¹⁷Umuundu uwe shiisa afuna bibimuyeeta umweene, ne uyo uuli umurafu etsiinisa busa umweene.

¹⁸Kumukheemba kweesi umuundu umubi afuna kuba kwe mbuka ifwiiti iri, ne uyo ukhola bye bukwalaafu afuna shiwaanwa shaŋali.

¹⁹Umuundu yeesi ukhakakho khuukhola bye bukwalaafu anyoola buulamu, ne umuundu utsililila khuukhola buubi atsya khuuhela.

²⁰Umukasya s'akanilakho ilala babaandu be kimyoyo kikyaborokha ta, ne ekhoyela abo babaakhola bye bukwalaafu.

²¹Muli ni khuushimanyila ilala muri babaandu baabi bali ni khuufuna shitaambiso, ne abo babaali bakwalaafu batsya khuwona.

²²Bumiliwu bw'omukhasi ukhola bye bubwaana, buli busa nga khakhuuma khe zaabu khakhaali khu lyoolu lye mbiitsi.

²³Bibiindu byeesi babaandu bakwalaafu bakana byaamamwo biilayi byonyene, ne babaandu babaali baabi bali ni khuusuubila kumutaambo kwonyene.

²⁴Babaandu babaandi bahaana naabi khu bye buyiindifu byaabwe, ne beloosela busa khuuba bayiindifu. Ne baalala bali barumaandu[1], ne beloosela busa khuuba bataambi.

²⁵Umuundu ukabilakho babaandi atsya khuyiindila naabi, ni nooyo uyeeta babaandu babaandi naye atsya khuyeetebwa.

²⁶Babaandu batsuba naabi umuundu uwibiikhilisa biilyo byeewe bikhupake bari nio abikulise khu buukusi bwe angaaki, ne bekhoyela naabi uyo urusa bibyeewe waabikulisa khu mbuka isi bikanibwilamwo.

²⁷Umuundu yeesi uweentsa khuukhola buulayi, babaandu bamuwa lukoosi, ne uyo yeesi ukana khuukhola buukosi bwonyene, anyoola buukosi bweene.

²⁸Umuundu yeesi uwiyikina buyiindifu bweewe, atsya khuniaala nga lisaafu lye kumuumu, ne uyo uuli umukwalaafu atsya khunera afwaane nga lisaafu lye khu kuusaala kuulayi.

²⁹Umuundu yeesi utumbuusa be muungo mweewe, singene abekho ni sheesi kane asikhile ta, umuundu uuli umusilu kane abatsake busa umwakaanisi w'omuundu umukyesi.

³⁰Buuraambi bwe bakwalaafu bwikyela kuusaala kwe buulamu, n'umuundu uwe kamakhula efunila basaale.

³¹Babaandu bakwalaafu bafunila kumukabo kwaabwe ano khu shibala khaale, ni naabo nabo babaali baabi luundi baboonaki, batsya khufuna shitaambiso shaabwe.