Read lumasaaba Tsinikha 12 Bible Online

Tsinikha 12 - lumasaaba bible

Tsinikha 12

¹Umuundu yeesi ufukiilila khukhwikiitsibwa lwe buubi bweesi akholile, aba akana khukhwiyika, ne uyo ukhakana khukhwikiitsibwa ta, aba umusilu.

²Umukasya akana naabi umuundu ukhola bye bukwalaafu, ne akhalila kumusaango umuundu ukhola bye bumoyaani.

³Umuundu s'anyala weyimisawo lwe bubwoonaki ta, ne babaandu bakwalaafu beemikha beenyweesela ilala.

⁴Umukhasi umulayi ali ikuutwa y'omuseetsa weewe, ne umukhasi ureerera umuseetsa weewe kamaŋaanyu ali busa butsiina bwe mu makuumba.

⁵Bibyambaaso bye babaandu bakwalaafu bili bya ŋali, ne kamakyesi keesi babaandu baabi bawa kali kamabi.

⁶Biilomo byeesi baboonaki barusa bireera khuuhela, ne biilomo bye bakwalaafu biwonesa babaandu.

⁷Baboonaki bafwa baweelawo ilala, ne tsiingo tse babaandu bakwalaafu sitsikwa ta.

⁸Umuundu umulayi bamusiima lwe kamakhula keewe, ne uyo uuli umusilu bamulekelesa.

⁹Shiba shiilayi khuuba umuundu uwabusheele busa nga eraambisa umweene, khufuurisa uyo uwiniinisa khuuba uwe angaaki naabi, ne nga s'ali ni biilyo ta.

¹⁰Umuundu umukwalaafu enaanayo lwe bisolo byeewe, ne baboonaki buli mbuka baba baarafu naabi.

¹¹Umuundu uraamba ni kamaani mu mukuunda kweewe, aba ni biilyo biikali; ne uyo uwambaasa bibikhalimwo ta, s'aba ni kamakyesi ta.

¹²Umuundu umubi akhakakho khukhwiibisa mu bubi, ne babaandu babaali baakwalaafu baahandalalila ilala, bafuna bibyaabwe.

¹³Babaandu baboonaki bawaambikhila mu bilomo byaabwe biibi babeene, ne abo babaali baakwalaafu bawona khukhwaama mu bubi.

¹⁴Biilomo bibyaama mu khanwa kh'omuundu binyala byaamureerera tsikhabi, nga buraambi bwe kamaani ni bureera biwaanwa biikali.

¹⁵Umuundu umusilu ambaasa ari byeesi niye aloma bili byaŋali byonyene, ne umuundu we kamakhula awuliilisa khuboolelelwa.

¹⁶Umuundu umusilu nga wakhalaale, amanyikhana khaangu naabi, ne umuundu we kamakhula awoleela busa abe yakhaba nga baamukhomakile.

¹⁷Umuundu ukanikha bya ŋali awa bujulisi bwaŋali, ne umuundu ukhali umwiyikinwa ta akanikha bye bubeeyi byonyene.

¹⁸Babaandu baalala bakanikha biilomo bibyookiya nga lurima, ne biilomo bibikanikhibwa ni kamakyesi bireera khuuwona.

¹⁹Biilomo bya ŋali biramawo lubuula khuumala imbuka indeeyi, ne bubeeyi bumala imbuka ifwiiti iri.

²⁰Bubeeyi bwitsula mu byambaaso byaabo babaŋoonaŋoona khuukhola bubwoonaki, ne kumwikhoyo kwitsula mu byambaaso byaabo babaakhola buulayi.

²¹Babaandu baalayi sibakaananakho buukosi bwoosi ta, ne baboonaki baayitsula kumutaambo kwonyene.

²²Umukasya waabiyila babaandu babaakanikha bye bubeeyi, ne ekhoyela abo babaakanikha bwaŋali.

²³Umuundu umukyesi s'eyokesanisa ari ali ni kamakyesi ta, ne umusilu asalanisaka busa buusilu bweewe buli aandu oosi.

²⁴Umuundu uraamba ni kamaani ekyela umuraangilisi, ne khuuba umutoro wikyela umukulwa.

²⁵Khukhwiyembelela khumalakho umuundu lukoosi, ne biilomo bibisamwo kamaani bireera kumwikhoyo.

²⁶Umuundu umukwalaafu ali umwitsiliilisi naabi isi basaale beewe, ne umwoonaki akila wababorosa.

²⁷Umuundu umutoro s'anyala ni khukhwiteekhela isaanyi yeewe ta, ne uyo uraamba ni kamakyesi araambisa buli shiindu shoosi sheesi afuna.

²⁸Kumukhoosi kwe bukwalaafu kureera buulamu, ne kumukhoosi kwe bubwoonaki kuyila mu khuhela.