Read lumasaaba Tsinikha 13 Bible Online

Tsinikha 13 - lumasaaba bible

Tsinikha 13

¹Umwaana uwe kamakyesi awuliilisa byeesi paapa weewe amuleekela, ne umuundu uwe shikili s'awuliilisa nga bamureewula ta.

²Umuundu umulayi afuna biilayi bye khuulya lwe biilomo biilayi bibyaama mu khanwa mweewe, ne abo babaali bawombesi bekhala nga bewotooma busa khuukhola bye bituluungu byonyene.

³Uyo uwiliinda lulimi lweewe mu byeesi akanikha, aba weliindile buulamu bweewe, ne uyo uwilomaloma busa bibiikhalimo ta, atsya khuhela.

⁴Umuundu umutoro ewotooma khuufuna biikali, ne waafuna bikyeekhe biri; ne uyo uraamba ni kamaani, afuna buli shoosi sheesi akana.

⁵Umuundu umukwalaafu s'akanilakho ilala bubeeyi ta; ne biilomo bye baboonaki bireera tsisoni ni khuuswaala khuukali.

⁶Bukwalaafu bukhiinga kumukhoosi kwe bakwalaafu; ne shishoonako shihesa baboonaki.

⁷Babaandu baalala bekholakhola khuuba nga bayiindifu naabi, ate nga mbaawo sheesi bali nasho ta; ne babaandi bekholakhola khuuba bataambi naabi, ate bali ni buyiindifu buukali naabi.

⁸Bayiindifu baraambisa buyiindifu bwaabwe khuubeyimilila; ne umutaambi s'abakho ni shihaangafu shifwaana shiryo ta.

⁹Itaala y'omuundu umukwalaafu yikhala nga yaaburukha khuureera buwaanga; ne itaala y'omuundu umwoonaki isima khaangu.

¹⁰Khukhwiyiingayiinga khureera khuutumbuukha; ne abo babarekeeresa khuuboolelelwa bafuna kamakhula.

¹¹Buyiindifu bweesi utsya nga ufunaka mu khaangu naabi mu mikhoosi kimibi, buwawo khaangu naabi; ne bweesi ubuusa nga uraamba ni kamaani, butsya bwabalaaha.

¹²Khuuba ni kumwiyikino kumukali mu shiindu, ne shaalekha khwaamamwo nga n'ukanile ta, shikhukhola walwaala na khulwaala; ne kamarooro keesi uba nako nga koleleele, kakhwitsusa kumwikhoyo.

¹³Umuundu yeesi ukhafukiilisa kamakyesi kakaamuweebwa ta, ereerera buukosi; ne uyo uloondelela biilakilo, afunilamwo.

¹⁴Khuuleekela khukhwaama isi umuundu uwe kamakhula khuli nga isebele ye buulamu; abo boosi babaloondelela khuuleekela ukhwo, bewoma kimireko kye khuufwa.

¹⁵Umuundu uuli ni kamakyesi kamasaalikhana, afuna lukoosi; ne umuundu ukhali umwiyikinwa ta, atsya khu mukhoosi kwe khuuhela.

¹⁶Buli shiindu shoosi sheesi umuundu we kamakhula akhola, ashikhola ni kamakyesi; ne uyo uuli umusilu, okyesanisa buusilu bweewe.

¹⁷Umurume ukheyikinikha ta areerera babaandu buwaangafu, ne umurume umwiyikinwa, areera lukoosi.

¹⁸Umuundu ukhawuliilisa khuureewula ta, akwa mu butaambi atweela ni khuswaala; ne uyo yeesi ufukiilisa baamukolomosa afuna shiriifwa.

¹⁹Kamarooro kakaakhuyila waafuna sheesi ukana, kakhureera kumwikhoyo; ne shili she mbikho isi basilu nga mutweela khu nibo, waantsukhile bye bubwoonaki bweewe.

²⁰Umuundu ukyeendela atweela ni babaandu baakyesi naye ekyela umukyesi; ne uyo uwikhala mu basilu, afuna buukosi.

²¹Buukosi buloondelela baboonaki buli aandu; ne babaandu bakwalaafu bafuna biwaanwa biilayi.

²²Umuundu umulayi alekhela babetsukhulu beewe buusikha bweewe; ne buusikha bw'omwoonaki butsya mu makhono ke bakwalaafu.

²³Kumukuunda kw'omuundu umutaambi kunyala kwaabala biilyo biikali naabi; ne babalyakhana baabimalawo byoosi.

²⁴Umuundu ukharaambisakho imiimbo khuleekela umwaana weewe, aba s'amukana buulayi ta. Ne umuundu ukana umwaana weewe, amulatsakakho waamukolomosa.

²⁵Umuundu umukwalaafu alya wekurira ilala buulayi; ne umuundu umwoonaki s'alya wekura ta.