Read lumasaaba Tsinikha 14 Bible Online

Tsinikha 14 - lumasaaba bible

Tsinikha 14

¹Bakhasi babaali ni kamakhula boombakha tsiingo; ne umukhasi umusilu onakisaka muungo mweewe ni kamakhono keewe kameene.

²Umuundu yeesi ukyeendela khu mukhoosi kwe bukwalaafu arya Umukasya; ne abo babaakyeendela khu mukhoosi kukwaborokha bamulekelesa.

³Inganikha iy'omuundu umusilu niyo imureerera khuukhupibwa; ne biilomo by'omuundu umukyesi bimukhola waaba buulayi.

⁴Nga yaakhubawo iyeeyi ilima ta, birara bitaambamwo biilyo; ne nga waabeele ni iyeeyi iye kamaani, ukyesa biilyo biikali.

⁵Umujulisi uwaŋali s'akanikha bye bubeeyi ta; mbaawo shiindu shiindi sheesi umubeeyi akanikha ta akhali bubeeyi bwonyene.

⁶Umuundu umulekelesi akhaweentsa kamakhula s'akanyoola ta; ne umuundu we khuumanya nga waakaweentsile akanyoola khaangu.

⁷Lekha umuundu umusilu abe, ukhamenya naye ta, lwekhuuba mbaawo biilomo byoosi bye kamakyesi byeesi unyala waamunyoolamwo ta.

⁸Umuundu umukyesi waamanya kumukhoosi kwe khuutsyakho, ne abo babaali basilu bakaraangarana busa.

⁹Babaandu baasilu sibenaanayo oba balikho booneka ta, ne abo babaarya Wele benaanayo baatsya baŋoona.

¹⁰Buli mwoyo kw'omuundu kwaamanya butsiina bwakwo bwe mukari, naluundi mbaawo umuundu ukuundi unyala waakabana khu mwikhoyo kwakwo ta.

¹¹Intsu y'omuundu umwoonaki ikhoonakisibwe iwewo, ne lisari ly'omukwalaafu limala imbuka indeeyi.

¹²Iliyo kumukhoosi kweesi umuundu anyala khuuwaamba nga ambaasa ari kumulayi, ne khu ntsakamwo kwaamuyila mu khufwa.

¹³Khuutsekha khunyala khwaaba khwe khu ngaaki busa, ne nga mukari mu mwoyo mulimo kumutaambo, ne nga khuutsekha khwaaweele, kumutaambo ukwo kwirurukhilila.

¹⁴Umuundu uwoneka afuna shiwaanwa she buraambi bweewe; n'umuundu umulayi naye afuna shiwaanwa she buraambi bweewe.

¹⁵Babaandu babaakhali ni kamakyesi ta bafukiilila buli shiindu shoosi sheesi bawulila; ne babaalimwo kamakhula bemenieelesa buli shiindu sheesi bakhola.

¹⁶Umuundu umukyesi etsiliilisa luundi ewoma buukosi bubwiitsa, ne uyo uuli umusilu elekhuulaka busa aryo.

¹⁷Babaandu babaaniinaniina ni buurafu bakholela bibiindu mu busilu, n'umuundu ukheyikinikha ta, baamubiyila.

¹⁸Babaandu be aasi bakhola nga kamakyesi kaabwe ke aasi ni kaloma, ne abo babaali ni kamakyesi bafuna khuumanya.

¹⁹Babaandu baboonaki kane bafukhame aasi mu moni tse babaandu baalayi, ni baabi kane bafukhamile a bilibwa bye bakwalaafu.

²⁰Mbaawo umuundu ukanakho uyo uuli umutaambi ta, abe yakhaba n'umwesanwa weewe umweene; ne abo babaali bayiindifu bali ni basaale baakali.

²¹Umuundu ulekelesa umwesanwa weewe akhola bubwoonaki; ne ali ni tsikhabi uyo uuli uwe shiisa isi bataambi.

²²Abo babaŋoonaŋoona khuukhola buubi, batsya bakoraana; ne abo babaŋoonaŋoona khuukhola buulayi batsya baanyoola khuukana ni bubwiilama.

²³Khuuraamba ni kamaani khuureera kamafuurisa, ne khukhwiila mu khwilomaloma busa khureera butaambi.

²⁴Buyiindifu buli liyabi lye babaali ni kamakhula, ne khulekha khumanya khuli khwe basilu.

²⁵Umujulisi umwiyikinwa awonesa buulamu, ne umuwombesi alya mu baandu babaandi tsimbomelo.

²⁶Umuundu urya Umukasya aba ni buliindi bwe kamaani, ni naye umweene kane abe bubwilukhilo isi babaana beewe.

²⁷Khuurya Umukasya niyo isebele iye buulamu, niyo ikila walekha khukwa mu mureko kwe khuufwa ta.

²⁸Khuuba ni lituuli lye babaandu baakali nisho shiriifwa sh'omuyiinga, ne khutaamba babaandu be khuraangilila, mbaawo umuwuli sheesi afuna ta.

²⁹Umuundu ukhokesanisa khaangu lirima lyeewe ta, aba ali ni kamakhula ke angaaki naabi, ne uyo ukhalalaka khaangu okyesanisa khulekha khumanya ta.

³⁰Kumwoyo kukuuli ni lukoosi kureera buulamu mu mubili, ne libuba likhulya lya khumalawo.

³¹Umuundu yeesi umiinikhilisa umuundu umutaambi, aba akhomaka Umubuumbi weewe; ne uyo yeesi uuli uwe shiisa isi umutaambi okesanisa shiriifwa isi Wele.

³²Babaandu baabi bahela lwe buubi bweesi babeene bereerera, ne abo babaali bakwalaafu bafuna bubwilukhilo abe yakhaba mu khufwa.

³³Kamakhula kaayitsula mu mwoyo kw'omuundu uuli ni khuumanya, ne mu basilu s'unyoolamwo khuumanya ta.

³⁴Bukwalaafu bureerera linaambo shiriifwa, ne shishoonako shireerera linaambo khuuswaala.

³⁵Umuyiinga ekhoyela umwakaanisi uraamba ni kamakhula, ne lirima lyeewe liweela khuuyo umureerera khuswaala.