Read lumasaaba Tsinikha 15 Bible Online

Tsinikha 15 - lumasaaba bible

Tsinikha 15

¹Khukhwiilamo ni buwolu khumalawo lirima; ne khukhwiilamo ni buurafu khulooselakho busa buurafu bweene.

²Biilomo by'omuundu umukyesi bireera khuumanya, ne kumunwa kw'omusilu kurusa bye buusilu byonyene.

³Tsimoni ts'Omukasya tsibona buli aandu; nga tsilolelela buli shiindu shiibi ni shiilayi sheene.

⁴Biilomo bye shiisa bili nga kamasuuswa kakawonesa buulamu, ne biilomo biirafu bifuniaaka kumwoyo.

⁵Umuundu umusilu alekelesa byeesi paapawe amuleekela, ne uyo urekeeresa buulayi okesanisa khuumanya.

⁶Muungo mwe babaandu be kamakhula mubamo bye buyiindifu biikali, ne bye buyiindifu bye baasilu bibawakho nga buukosi bweetsile.

⁷Biilomo bye kamakyesi bibikanikhibwa bireera khuumanya, ne bye basilu mbaawo sheesi bimanyisa ta.

⁸Umukasya s'ekhoyela isaayilo iye bubwoonaki ta, ne khuuloomba khwe bakwalaafu khumureerera kumwikhoyo.

⁹Kumukhoosi kwe baboonaki kuli she mbikho isi Umukasya, ne akana naabi abo babaaweentsa bukwalaafu.

¹⁰Umuundu yeesi urura khu mukhoosi kumulayi afuna shitaambiso she kamaani, uyo yeesi ulekelesa khuuboolelelwa atsya khufwa.

¹¹Isi Umukasya anyalila khuumanya bibiindu byoosi bibiili i Makoombe ni mu Khuhela, iliwo shishinyala shaamukhaasa khuumanya mu myoyo kye babaandu?

¹²Umuundu umulekelesi yeesi s'akana baamuleekela ta, s'anyala ni khuutsya wereebakho isi be kamakhula ta.

¹³Kumwikhoyo kwe mu mwoyo kureera isangaalo mu moni, ne kumutaambo kwe mukari kureera khukhwiwunamila mu mwoyo.

¹⁴Umuundu uwe kamakhula aba akana naabi khukhwiloosela khukhwiyika, ne umusilu ewulila ari khulekha khumanya khweewe khumumala.

¹⁵Bifukhu by'omutaambi byoosi biba bifukhu bye kumutaambo, ne babaandu basangaafu beloosela busa ni kamayiiya.

¹⁶Shiba shiilayi waaba ni khakhaandu khakyeekhe khari nga wisamwo Umukasya shiriifwa, khufuurisa khuuba ni buyiindifu buukali atweela ni ngunyi.

¹⁷Shiilayi khuulya biilyo bibiilikho tsinyanyi tsimali nga iliwo khukana, khufuurisa khuulya tsinyama tsiinule nga iliwo shibiyiile.

¹⁸Umuundu uniinaniina lirima areera tsikhaando, ne uyo uuli umuwolu amalawo khukhweesana.

¹⁹Intsila khweesi umuundu umutoro akyeendela khwaayitsula kamawa, ne intsila iy'omukwalaafu kuli kumukhoosi kumutsalaafu.

²⁰Umwaana uwe kamakhula areerera paapawe kumwikhoyo, ne uyo uuli umusilu alekelesa maayi weewe.

²¹Umuundu umusilu ekhoyela mu khulekha khumanya kweewe, ne umuundu uwe kamakhula akyeendela khu ntsila intsalaafu.

²²Nga s'uli ni babaakhuwa khu makyesi ta, byeesi uŋoonaŋoona sibitsya buulayi ta, ne nga uli ni babaakhuwa khu makyesi baakali, byoosi bitsya buulayi naabi.

²³Shiba shiilayi luundi shikhoyesa khuufuna ilomo iye khukhwiilamwo iyaakhila, khu mbuka inyene.

²⁴Umuundu uwe kamakhula akyeendela khu mukhoosi kukuniina mu ngaaki khuutsya mu bulamu, ne waalekha ukwo kukwiikha aasi i makoombe.

²⁵Umukasya afuniaakaka tsiingo tse babaandu babeyiingayiinga, ne waakhiinga bibiindu bya namulekhwa.

²⁶Bibyambaaso by'omuundu umwoonaki bili bye mbikho isi Umukasya, ne ekhoyela biilomo bye bukwalaafu.

²⁷Umuundu uwe kumulyuulyuu ukana khuyiindila khaangu areerera be muungo mweewe boosi kumutaambo kumukali, ne abo babekaana khuulya iwoongo bekhiinga babeene bamenyakawo.

²⁸Babaandu bakwalaafu banyoowa bambaasamwo khabili nio baabakho ni sheesi beelamwo, ne bamoyaani bayuubakilisa khaangu khukhwiilamwo ne ndi biba biilomo biibi byonyene.

²⁹Umukasya aba aleeyi naabi ni babaandu babaali baboonaki, ne awuliilisa khuuloomba khwe bakwalaafu.

³⁰Mu moni mumubamwo khuumuunamuuna mureera kumwikhoyo isi kumwoyo, ni kamakhuuwa kamalayi kakhwiisamwo kamaani.

³¹Umuundu uwuliilisa buulayi biilomo bye khuuleekela, eloosela khuuba ni kamakhula.

³²Umuundu ukhawuliilisa byeesi bamuleekela ta, etsiinisa busa umweene, ne siinga awuliilisa waabitsiilakho buulayi, elooselakho khuumanya.

³³Khuuba ni khuurya isi Umukasya khureera khukhwiyika mu makhula, ni khuuba umuwolu khuukhuraangilila khwaakhuyila mu shiriifwa.