Read lumasaaba Tsinikha 16 Bible Online

Tsinikha 16 - lumasaaba bible

Tsinikha 16

¹Umuundu anyala waakhola tsiŋoonaŋoona tseewe tse mu mwoyo, ne Umukasya umweene niye uuli ni she khukhwiilamwo shishakamayo.

²Umuundu anyala wambaasa ari byeesi akhola bili bikwalaafu mu moni tseewe, ne Umukasya niye uwimenieelesa kumwoyo.

³N'uwaaneyo buuraambi bwoowo isi Umukasya, ni tsiŋoonaŋoona tsoowo kane tsibiremo buulayi.

⁴Umukasya waakhola buli shiindu shoosi khuuba ni shitsilililwa shasho, ni babaandu baboonaki baliwo lwe shifukhu she kumutaambo.

⁵Babaandu babeyiingayiinga bali be mbikho isi Umukasya, uli ni khuushimanyila ilala uri batsya khufuna shitaambiso.

⁶Khakakho naabi ube ni khuukana khwelala, ni bubwiyikinwa bubuuli bwa ŋali, ufune khukhwiyakhilwa bibyoonako, mu khuwa Umukasya shiriifwa, umuundu s'anyala waatsya woneka ta.

⁷Umuundu siinga amenya buulamu bubwikhoyesa Umukasya, abe yakhaba baasiku beewe bakhakakho khuuba basaale ni naye.

⁸Shiilayi khuuba ni khakhaandu khakyeekhe khari, kheesi wafuna mu bukwalaafu, khufuurisa khuuba ni bibiindu biikali byeesi wafuna mu khulyakhana.

⁹Umuundu anyala wakhola tsiŋoonaŋoona tseewe tsoosi, ne Umukasya niye ukhalawo eena isi ali ni khuutsya.

¹⁰Umuyiinga akanikha nga araambisa buunyala bwe angaaki, nashiryo khuukhalawo khweewe khuba khwa ŋali.

¹¹Umukasya akana ari yaakha khuubawo tsimintsaani ni bibipima bibiili bya ŋali, bipimo byoosi byareebwawo ni naye.

¹²Shiba she mbikho bayiinga khuukhola bye bubwoonaki, lwekhuuba bali ni khuuwula nga beemikha khu bukwalaafu.

¹³Umuyiinga ekhoyela naabi inganikha ingwalaafu; asangaalila naabi umuundu ukanikha byaŋali.

¹⁴Umuyiinga nga wakhalaale shireera khuufwa, ne umuundu umukyesi akhakakho khuumusangaasa.

¹⁵Umuyiinga nga waasangaalile, shimanyisa shiri buulamu buliwo, nga wokesanisile khuukana shifwaana nga namufweeli ureera ifula mu mbuka inyene.

¹⁶Khuufuna kamakhula shili shikhulu naabi khuufuurisa khuuba ni zaabu, khuufuna khuumanya shifuura khuuba ni feetsa.

¹⁷Kumukhoosi kw'omuundu umukwalaafu kwawukhana ni buubi, nashiryo yitsiliilisa khweesi utsya, unyala wawonesa buulamu bwoowo.

¹⁸Nga khukhwiyiingayiinga khwaaraangiile, ibawo khuuhela, ni khukhwiniinisa angaaki nga khuli ibweeni, ibawo khuukwa.

¹⁹Shiilayi shifuurakho khuumenya nga uli uwe aasi atweela ni bataambi, khufuurisa khukabananila atweela ni babeyiingayiinga

²⁰Umuundu yeesi uwuliilisa buulayi byeesi bamuleekela anyoola biilayi, n'umuundu uwiyikina Umukasya afuna kumwikhoyo.

²¹Umuundu uwe kamakhula mu mwoyo, amanyikhana lwe khuumanya khweewe, ni inganikha indayi ikhweeselesa babaandu baakali.

²²Kamakhula niko burakikhilo bwe buulamu isi uyo uuli ni nako, ne khuukhakakho uri uleekela umuundu umusilu umala busa imbuka yoowo.

²³Khukhwaama mu ntsambaasa iye kamakyesi mulimo biilomo bye kamakhula, biilomo bye kamakhula bireerawo tsinjuukhashuukha.

²⁴Biilomo bibiilimwo khuukana bili nga bubuushi bwe ntsukhi, byaatokota bireera khuusangaala ni kamaani mu mubili.

²⁵Iliwo kumukhoosi kweesi umuundu anyala wambaasa ari kumulayi, ne khu ntsakamwo kwaareera khuufwa.

²⁶Khuukana bye khuulya khukila umuraambi waraamba ni kamaani, ni intsala muunda ikila waakhakakho naabi.

²⁷Umuundu umubi ebuulila basheewe nga akana khuubakhola buubi, yakhaba ni biilomo byeewe byeene bitindiima busa nga kumulilo.

²⁸Umuundu we lukaambo areerawo khuusalanisa, lukaambo lukila basaale baawukhana.

²⁹Babaandu be bituluungu baborosa bashaabwe, baabayila khu mukhoosi kukukhali kumulayi ta.

³⁰Babaandu babaaminamina tsimoni lwe buubi, baba bakana khuukhola bashaabwe buubi, ni naabo babaakhweesakhweesa imunwa, baba batsya khureera buukosi.

³¹Litsuune lilyakhosa tsiifwi lyokesanisa shiriifwa; litsuune lilyakhosa lyokesanisa umuundu uwamenya buulamu bukwalaafu.

³²Umuundu uwula lirima lyeewe afuurira aleeyi umusoolani uwe kamaani, uyo uwiwula mu mwoyo kweewe afuura uyo uwibwakala shiriimba waashiwaamba.

³³Babaandu banyala batuuma khakokha khuukana khuumanya sheesi Wele akana, ne khuukhalawo khuumaliilisi khwoosi khwaama isi Umukasya.