Read lumasaaba Tsinikha 17 Bible Online

Tsinikha 17 - lumasaaba bible

Tsinikha 17

¹Shifuura khuulya kumukaati kumwoomu busa ne nga uli ni lukoosi lwoowo, khuufuurisa khuuba khu mayiiya kamaboofu, nga iliwo khuulomana.

²Umukulwa uuli ni kamakyesi afuna buunyala bwe khuuloolelela umwaana we muungo uwibirisaka buubi, n'umukulwa mweene afuna kumukabo kwe bibiindu bye muungo mweene wafwaana nga mutweela khu baana.

³Izaabu ni feetsa babikhaka nga baraambisa kumulilo, ne kimyoyo kye babaandu kikhakibwa n'Umukasya umweene.

⁴Babaandu baabi bakana naabi khuurekeeresa bibyambaaso bibiili bimoyaani, ni babeeyi nabo bakana naabi khurekeeresa lukaambo.

⁵Umuundu yeesi utsekhelela umutaambi, aba ali khutsekhelela uyo uwamubuumba; ni nooyo uwikhoyela biikosi by'okuundi, ali ni khuufuna shitaambiso.

⁶Babetsukhulu bali shishiindu she shiriifwa naabi isi bakuuka ni bakuukhu baabwe; basaali nibo kumwikhoyo kwe babaana.

⁷Inganikha indayi siyaakha isi umuundu umusilu ta, ni khuukanikha bye bubeeyi sibyaakhila isi umuwuli ta.

⁸Khuuwa iwoongo shili nga khuukhupa ikarata, buli muundu ukikaba ewulila ari waabiriremo.

⁹Buli muundu yeesi uwiyakhila buubi bubukholebwele aba aweentsa khuukana, ne uyo uutsya nga ashebulila bibyabira onakisa buusaale.

¹⁰Khuureewula kumuluundi mutweela kwonyene khuuyeeta naabi umuundu uwe kamakhula, ne umusilu s'anyala waamanya ta abe waakhamukhupa kimiluundi shitoondo shibuufu.

¹¹Babaandu baboonaki bakana naabi khuureerawo khuusoolana, ne baabasiindikhila baselikhale baarafu baabasalanisaka.

¹²Shifuurisakho buulayi khukhwakaanana ni shibulukhu sheesi banuulilekho bubwaana bwasho, khufuurisa khukhwakaanana n'umusilu ukhamanya ta.

¹³Iwe siinga ukhola buubi khu muundu ukhukholile buulayi, buukosi singene bururatsakekho muuntsu yoowo ta.

¹⁴Khurakikha khuulomana khuli nga khukhwaatikha khwe kumufureje kwe kameetsi, uli ni khukhwakaamisilawo nga buukosi bushiili khuyiindila ta.

¹⁵Umuundu ulekhuula uyo uwoonakile waatsya busa, n'umuundu ukhalila uyo uuli umukwalaafu kumusaango, babafwaana baryo bali she mbikho isi Umukasya.

¹⁶Sishiyeeta khuubukula tsinusu uri usasulile umuundu umusilu khuutsya khukhwiyika ta, lwekhuuba niye s'alimo ni kumwoyo kukukana khukhwiyika ta.

¹⁷Umuundu umusaale aba umusaale imbuka yoosi, ne balebe babawo lwe khuyeeta mu bikosi.

¹⁸Umuundu ukhali ni kamakyesi ta ayila ikifunisi iye khusasula likobi ly'owashe, namwe werawo khukhwiimilila umuundu ukuundi nga atsya khukhwiwola.

¹⁹Umuundu yeesi ukana khuulomana, aba akana khuuba mu bikosi buli imbuka, ni nooyo ukana khuukyeendela angaaki aba elaangila buwaangafu.

²⁰Umuundu uuli ni bibyambaaso bibyaborokha s'anyala waayiindila ta, ni nooyo uuli ni lulimi lwe buwombesi akwa mu buwaangafu.

²¹Umwaana uuli umusilu areerera paapa weewe kumutaambo; siibawo kumwikhoyo nakhari isi paapa w'omusilu ta.

²²Khuuba ni kumwikhoyo kwe mu mwoyo shikhureerera buulamu buulayi; ne khuuba ni kumwoyo kwe kumutaambo kumalamo kamaani.

²³Umuundu uuli umwoonaki afukiilila khuulya iwoongo, nisho shikila bwaŋali bwakoraanawo.

²⁴Umuundu uwe kamakyesi awunguusa tsimoni tseewe isi bye kamakhula byonyene, ne tsimoni ts'omusilu tsinyukanyuka busa isi shibala shoosi.

²⁵Umwaana umusilu areerera paapa weewe kumutaambo, ni butsiina bwe mu mwoyo isi maayi weewe uwamusaala.

²⁶Sishiba shiilayi khuuwa umuundu umukwalaafu shitaambiso lwe buulayi bweewe, namwe khuukhupaka babaandu baalayi shiba shiibi.

²⁷Umuundu uwe kamakyesi araambisa biilomo bikyeekhe biri, ni nooyo uuli ni kumwoyo kwe khukhwiiwula, ali umuundu uwe kamakhula.

²⁸N'umuundu umusilu ukhelomaloma ta, bamwaambasilisa khuuba uwe kamakyesi, nga waakhwinyusa kumunwa kweewe khuukanikha ta, bamwaambasilisa khuuba umukyesi.