Read lumasaaba Tsinikha 18 Bible Online

Tsinikha 18 - lumasaaba bible

Tsinikha 18

¹Umuundu uwiyawulakho khu baasheewe enaanayo khu byeewe byonyene, aleekelesa byeesi babaandi baba baamanya.

²Umuundu umusilu s'enaanayo isi khuumanya ta, ne sheesi akana shonyene nikhwo khuukanikha byeesi niye ambaasa.

³Khuukhola buubi nga khwaabeelewo, khuuswaala nakhwo khwiitsilakho, nga shiiriifwa shaaweelewo ibawo kamaŋaanyu.

⁴Biilomo bibyaama mu khanwa kh'omuundu bili nga kameetsi kamaleeyi naabi, ni isebele iye kamakhula itsukhilila busa luluutsi lwe kameetsi.

⁵Sishiba shiilayi khukhwikhupila khu lubeka lw'omuundu umwoonaki ta, namwe khukhwimana bwaŋali isi umuundu umukwalaafu.

⁶Biilomo bibirura mu khanwa kh'omuundu umusilu bireera busa khuulomana, kumunwa kweewe kumweene kumureerera khuukhupibwa.

⁷Kumunwa kw'omuundu umusilu kumureerera khuuhela, kiminwa kyeewe kimyeene nikyo kumureko.

⁸Bilomo by'omuundu uwimoonyelesa ni lukaambo biŋaaha naabi, lwekhuuba umuundu ubirekeeresa abimila byeekha mu byambaaso mukari.

⁹Umuundu uuli umutoro mu buraambi bweewe afwaanana n'umuundu uwoonakisa bibiindu.

¹⁰Lisiina ly'Omukasya lili kumunaala kwe kamaani; babaandu bakwalaafu batimaka baatsya benjilamwo baaba buulayi.

¹¹Bye buyiindifu by'omuundu uwayiindila bili busa nga lumako lweewe lwe kamaani; babyambaasilisa khuuba kuseenge kukuuli kuleeyi naabi.

¹²Khukhwiyiingayiinga nga khwaabeelewo, khuraangilila khuhela, ne buwolu buraangilila shiriifwa.

¹³Nga ushiili khurekeeresa buulayi ne waamala keelakamwo busa uryo, shookesanisa buusilu ni khuswaala.

¹⁴Kumwoyo kw'omuundu kunyala khukhwikhalilikha butsiina bwe kumubili, ne naanu unyala wekhalilikha kumwoyo kukuuli kumutsiina.

¹⁵Babaandu be kamakyesi bali berekefu buli mbuka yoosi khuuweentsa kamakyesi. Baayikula kamaru kaabwe khuurekeeresa bye kamakyesi.

¹⁶Khuuwaana biwaanwa shiikulilawo umuundu kumulyaango, shimuwa ikhabi khukhwoola isi ni babaandu be angaaki.

¹⁷Umuundu unyoowa khukhwiwotsakho mwikayilo awulilikhana nga niye uuli uwaŋali, khukhwoolesa nga baarakikhile khuumureebaka bireebo.

¹⁸Khuukhupa khaakokha shiyeeta khuumalawo tsikhaando, shiyeeta khuukhalawo akari e babaandu babili babaali khuukhabisana.

¹⁹Siinga uyeeta uwe buulebe, ufwaana nga ureerewo litikiiyi lilikhiinga shiriimba lye kamaani, ne khuulomana ni naye, shifwaana nga mumureerewo kuseenge kukubawukhanisa.

²⁰Biilomo bye kamakhula khukhwaama mu khanwa kh'omuundu bikhwikusa nga uliile buulayi, biilomo bibikanikhibwa khu mbuka inyene bireera khukhwikura.

²¹Biilomo bibirura khukhwaama mu lulomo binyala khuureera khuufwa, namwe binyala byareera buulamu; ni naabo babaakana naabi khuukanikhaka luukali bakyesa bibyaamo byalwo.

²²Umusaani yeesi unyoola umukyelama aba wanyoolile shishiindu she lisuno, naluundi aba waafunile shiwaanwa shiilayi khukhwaama isi Umukasya.

²³Umuundu umutaambi nga akanikha, akanikha ni buwolu; ne umuyiindifu akanikha ni buurafu.

²⁴Iliwo basaale babekholakholanisa busa bari bali basaale, ne iliyo umusaale uuba aambi khufuurisa n'umulebe umweene.