Read lumasaaba Tsinikha 19 Bible Online

Tsinikha 19 - lumasaaba bible

Tsinikha 19

¹Shiba shiilayi khuuba umutaambi ne nga ukyeendela mu bukwalaafu, khuufuurisa umuundu uuli uwe kamalomo kamabi naluundi umusilu.

²Sishiba shiilayi khuuba ni lihefu ne nga s'uli ni kamakyesi ta, ni nooyo uyubakilisaka khaangu akoraanaka.

³Babaandu bahesa buulamu bwaabwe lwe buusilu bwaabwe babeene, lwanyuma bakyelawo bakhalalila Umukasya.

⁴Buyiindifu bukhufunisa basaale baakali naabi, ne butaambi bukila basaale bakhururakho.

⁵Umujulisi ukanikha bubeeyi mwikayilo aweebwa shiitaambiso, ni nooyo ukanikha bye bubeeyi mbaawo isi atitukhila ta.

⁶Bakali bakhakakho naabi khuubona bari basiimibwa n'umuundu uuli mu shifwo she angaaki; na buli mutweela aba umusaale uw'omuundu uwaana biwaanwa.

⁷Baalebe b'omuundu umutaambi bamulekelesa, ni basaale beewe nabo bamwaantsukha baamulekha.

⁸Umuundu ukhakakho naabi khuufuna kamakhula aba ali ni khuukana isi umweene, babaandu babaakana naabi khuumanya batsowatsowana.

⁹Umujulisi ukanikha bubeeyi mwikayilo aweebwa shiitaambiso, ni nooyo ukanikha bye bubeeyi atsya khuhela.

¹⁰Sishaakhila umuundu umusilu khuumenya mu bulamu bubwikhoyesa ta, n'umukulwa khuuwula mu shifwo sh'omuyiinga ta.

¹¹Babaandu bakyesikyesi banyalisa khukhwiwula lirima lyaabwe, bafuna lukoosi lwekhuuba beyakhila buubi bwe babaandi.

¹²Lirima ly'omuyiinga lifwaana nga khubuutsa khwe talanyi, ne nga umuyiinga waasangaalile, shifwaana nga liime khu bunyaasi.

¹³Umwaana umusilu areerera paapawe kumutaambo. Umukhasi umulomani afwaana nga ifula iye lumunyakiliisi iroonya toki toki toki toki.

¹⁴Unyala waasikhila tsiintsu ni bye buyiindifu bibiindi khukhwaama khu basaali, ne umukhasi uwe kamakhula aama isi Umukasya.

¹⁵Butoro bureera liilo nameyirira lilyeene, ni khuulekha khubakho ni she khuukhola shireera intsala ingali.

¹⁶Umuundu uwiliinda kamakaambila, aba eliinda buulamu bweewe, khuulekelesa biilomo bibiboolelela, shireera khuufwa.

¹⁷Umuundu uyeeta uyo uuli umutaambi, aba ali khukhwikopesa isi Umukasya, n'Umukasya kane amusasule lweesho sheesi akholile.

¹⁸Latsakakho babaana boowo khuubesamwo tsisaambo nga ushiiliyo ni kumwiyikino mu nibo, wamweene ukhaba mutweela khu biindu bibibahesa ta.

¹⁹Umuundu ututuba ni lirima liikali aakha khuuliha isho shishaakhila, ne siinga umuyeetakho kumuluundi mutweela, umanya uri kane umuyeetatsake lwaawa.

²⁰Urekeeresatsaka biilomo bibiboolelela, ufukiilisatsake nga bakhukaambilila, nio unyale khuufuna kamakhula mu buulamu bwoowo bwoosi.

²¹Umuundu anyala waakhola tsiŋoonaŋoona tsingali naabi mu byambaaso byeewe, ne she khuukhalawo sh'Omukasya shonyene nisho shishiifuura byoosi.

²²Shishifuura buukhulu mu muundu nikhwo khuuba umwiyikinwa; shifuura buulayi khuuba umutaambi khuufuurisa khuuba umulyakhani.

²³Khukhwookesanisa shiriifwa isi Umukasya shikhureerera buulamu, shireera khuumalibwa ni byeesi uli nabyo, luundi shikhukhiinga khukhwaama mu bubi.

²⁴Umuundu umutoro anyala waayila kumukhono kweewe mu sowaani, ne nga s'anyalisa ni khuusuta kumukhono kweewe kweene waakuniinisa imunwa ta.

²⁵Ukhupa umuundu uwe shikili, nio abo babaali be aasi beyikilakho, nga waakwalaasile umuundu uwe kamakhula, naye eloosela khuuba ni kamakhula.

²⁶Umwaana ubirisa paapawe buubi, namwe waatimisa maayi weewe, aba she khuswaala luundi aba webirisile buubi naabi.

²⁷Mwaana wase, iwe siinga waakamisa khuurekeeresa byeesi bakhuboolelela, kane ube waaborokhile khukhwaama mu bilomo bye kamakyesi.

²⁸Umujulisi uwe bubeeyi alekelesa byoosi bibikholebwa mwikayilo, ni naabo babaakhola bye bubwoonaki bekhoyela buubi.

²⁹Shiitaambiso shiliindiilila abo babaakhola bye shikili, ni khukhupa khu mukoongo khuli khwaabo babaali basilu.